გუმათი ქუთაისის გარეუბანია, სადაც 500-მდე ოჯახი ცხოვრობს. მოსახლეობის დიდი ნაწილი, რომელიც „გუმათჰესთან“ ახლოსაა დასახლებული, გზის შეკეთებას, სასმელი წყლის მილების გამოცვლას, გაზიფიცირებას და კანალიზაციის გაწმენდას მოითხოვს.
გასულ კვირას დასახლებას ქუთაისის მერი ეწვია და პრობლემების მოგვარების ვადად 2012 წელი დაასახელა.
მაინც, რას მოითხოვენ გუმათელები?
მოსახლეობამ „P.S.“-თან საუბრისას თავისი პრობლემები ასე გამოხატა:
ელგუჯა სულაქველიძე: „გუმათში უამრავი პრობლემაა, მათ შორის გზა არის შესაკეთებელი. იგი წლების განმავლობაში გაფუჭებულია და არავინ აქცევს სათანადო ყურადღებას. ამას ემატება გაზიფიცირება. ბუნებრივი აირი ჭომის დასახლებამდე მოყვანილია და ჩვენ სამი წლის განმავლობაში ამაოდ ველოდებით. კანალიზაციის ჭები მოძველებულია, უმოკლეს ხანში ესაჭიროება გამოცვლა. ზაფხულობით ისეთი საშინელი სუნი დგას ეზოში, რომ აქ გაჩერება ყოვლად შეუძლებელია. პლუს ამას კიდევ ერთი პრობლემა ემატება: ბოლო ხანს ცუდი გრაფიკით დადიან „მარშრუტკები“. შარშან ქალაქიდან „მარშრუტკა“ საღამოს ცხრა საათზე გამოდიოდა. ახლა კი რვა საათის მერე აღარ გამოდის. ანუ, გუმათელი კაცი რვა საათის შემდეგ ვერ დარჩება ქალაქში. ჩვენ ერთობლივად მოვითხოვთ, „მარშრუტკები“ იყოს ცხრა საათამდე. გასულ კვირას მოსახლეობამ განცხადებით მივმართეთ მერს, შევხვდით ბატონ გიას, ვესაუბრეთ ამ პრობლემებზე და გვითხრა, მომავალ წელს დავიწყებთ გზის შეკეთებასო.
ყველაზე სამარცხვინო ის არის, რომ რამდენიმე დღის წინ, სანამ მერი მოვიდა ჩვენთან სტუმრად, დამსხვრეულ ასფალტზე წინა დღეებში დაყარეს ხრეში. ეს მხოლოდ თვალის ასახვევად მოხრეშეს. სისულელეა, ხრეში დაყარო ასფალტზე. არცერთ ვარიანტში არ იქნება მყარი, დამიჯერეთ, უარეს შედეგს მივიღებთ. როდესაც გაწვიმდება, ხრეშს წყალი წაიღებს და უზარმაზარ ორმოებს გააკეთებს.
ასეთ პირობებში „მარშრუტკას“ უჭირს გადაადგილება და მოსწავლეები მასწავლებლებთან ერთად სკოლაში ფეხით დადიან. იცით, ძალიან გაგვიკვირდა, რომ აქ მოვიდა თევდორაძე. მისგან უამრავი დაპირება მივიღეთ. ზუსტად ასე თქვა: ახლა ქალაქის ბიუჯეტში საყოფი ფულადი რესურსი არ გვაქვს და მომავალ წელს ყველაფერს გაგიკეთებთო. ყველამ კარგად ვიცით, მაგენი რისი გამკეთებელი არიან! არ მაქვს იმედი, გუმათში მოაგვარონ პრობლემები. იცით, რაშია საქმე - გაისისთვის საპარლამენტო არჩევნებია დანიშნული და, უეჭველი, ამ მოვლენას უკავშირებენ. ესე იგი, თუ ხმას მოგვცემთ - გზას გაგიკეთებთო.“
ქეთინო გოდერიძე: „გუმათელებს გზის პრობლემა ძალიან დიდი ხანია გვაწუხებს. თქვენ თავად ნახეთ და დარწმუნდით, რა მდგომარეობაშია გზა. ასფალტი ხიდამდე დააგეს და ხიდის შემდეგ მიატოვეს. წვიმის დროს ჩვენამდე „მარშრუტკები“ არ მოდის. სასმელი წყალი ყოველდღე გვაქვს, მაგრამ დაბინძურებულია. მილები არის დახეთქილი და წყალს ტალახი ერევა. აი, ასეთ წყალს ვსვამთ (მღვრიე, ტალახიან წყალს ჭიქით მაწვდის)“.
მოხუცი ქალბატონი, ვინაობა არ გაგვიმხილა: „ჩემი მოთხოვნა ის არის, რომ გზა ხარისხიანად გააკეთონ. გაზი არ გვაქვს, მთავრობამ გვითხრა, 2012 წლამდე ყველა ოჯახის გაზიფიცირება მოხდებაო. აქ სამოცი წელია ვცხოვრობ და ბუნებრივი აირი არასოდეს მქონია. ამასთანავე კანალიზაციის ჭებია გამოსაცვლელი, რადგან კომუნისტების დროინდელია. როგორც გავიგეთ, წელს პროექტში არ არის ჩასმული, მაგრამ იმედი გვაქვს, ჩვენს მოთხოვნას გაითვალისწინებენ და გაასუფთავებენ!“
იზა ბაქრაძე: „ქალაქიდან გუმათი რამდენიმე კილომეტრითაა მოცილებული. ჩემო კარგო, ჩვენს დასახლებას გაზი არასოდეს ჰქონია. საცხოვრებელი ბინა გაუფორმებელი გვაქვს, ტალახიან წყალს ვსვამთ, კანალიზაცია გავსებულია, გზა გაფუჭებულია. აგერ უკვე მერამდენე წელია, ვინ იცის, რომ, ასე უპატრონოდ მიტოვებული ვცხოვრობთ.“
ქალბატონი (სახელი და გვარი არ გაგვიმხილა): „იცით, რა მაინტერესებს? სამი წელია ვცდილობ, გავიგო, ვეკუთვნი თუ არა ქუთაისს. მინდა გავაკეთო ბინის პრივატიზაცია. ამის თაობაზე, როდესაც მერიაში განცხადება შევიტანე, ყურად არ იღეს და პასუხი არ შემატყობინეს. მინდა, რომ ჩემი ბინა საკუთრებაში მქონდეს. გზა საერთოდ გაფუჭებულია, გაზი არ გვაქვს. ყველას ყველაფერი გაუკეთეს, მაგრამ ჩვენ რას გვერჩიან, ნამდვილად არ ვიცი.“
გოჩა გაბრიჭიძე: „ყველაზე სასაცილო ნამდვილად ეს არის. ქალაქის მმართველობა გვეუბნება, რომ ეს ტერიტორია თქვენ, გუმათელებს, გეკუთვნით, მაგრამ გზა - წყალტუბოსო. ძალიან გაურკვევლობაში ვართ. თურმე, იმიტომ დააგეს ასფალტი დასახლების მარჯვენა მხარეზე, რომ ის ქუთაისის ტერიტორიაა. აგერ, სკოლის ეზოდან კი იწყება სოფელი რიონი, ზემოთ ზარათია, რომელიც წყალტუბოს მუნიციპალიტეტში შედის. იქნებ გაგვარკვიოთ - ჩვენ ვის ვეკუთვნით.“
***
გუმათელების ნაამბობიდან მკაფიოდ ჩანს, თუ როგორ ზრუნავს ადგილობრივი ხელისუფლება მოსახლეობაზე. ცნობილია, რომ სახელმწიფო ბიუჯეტიდან „რეგიონული განვითარების სამინისტროს“ რეგიონების აღორძინებისთვის ასობით მილიონი ლარი ერიცხება. საინტერესოა, ამოდენა თანხა რაში იხარჯება? აქედან რატომ არაფერია გამეტებული გუმათელებისათვის? საინტერესოა, უმოკლეს ხანში იგეგმება თუ არა ქალაქის ამ უბნის ინფრასტრუქტურული განვითარება? ამ აქტუალურ საკითხზე ვცადეთ, ქუთაისის ვიცე-მერის, დავით ანდღულაძისგან მოგვეპოვებინა ინფორმაცია, პრესსამსახურის უფროსმა, ქეთი დეისაძემ ვიცე-მერთან ინტერვიუ მიზანშეწონილად არ მიიჩნია.
ქეთი დეისაძე, მერიის პრესსამსახურის უფროსი: „ინფორმაციას, როგორც პრესსამსახურის უფროსი, თავად მე მოგცემ. ხუთი დღის წინ ქალაქის მერი გუმათში ჩავიდა და მოსახლეობას პრობლემების მოგვარებას 2012 წლისთვის დაჰპირდა. სულ მალე რეგიონული განვითარების სამინისტრო წყლის და კანალიზაციის სისტემის რეაბილიტაციას დაიწყებს. პროექტი ითვალისწინებს ქუთაისის ოცდაოთხსაათიანი წყლით მომარაგებას. სამუშაოებისთვის ორასი მილიონი ლარი დაიხარჯება. გუმათში აუცილებლად გაკეთდება გზა, თან ექნება ოცწლიანი გარანტია. ამ საქმესთან წინასაარჩევნო პიარკამპანიას არანაირი კავშირი არა აქვს. არჩევნები 2012 წლის ოქტომბერშია დაგეგმილი და გზა სექტემბერში გაკეთდება. კიდევ ერთხელ გეუბნები, რომ თევდორაძემ მოსახლეობას 2012 წლის ბიუჯეტი გააცნო.“
მერიიდან მხოლოდ ეს მწირი ინფორმაცია წამოვიღეთ. დეისაძე დაგვპირდა, რომ ქალაქის მერს აუცილებლად გააცნობდა გუმათელების მიერ დასმულ შეკითხვას: გუმათის გზა, წყალტუბოს ეკუთვნის თუ ქუთაისს? მაგრამ, როგორც ყოველთვის, ხელისუფლებამ ხალხის კითხვას ყურადღება არც ახლა მიაქცია.