ბოლო პერიოდში მნიშვნელოვნად გახშირდა ე.წ. ,,საზღვრის დამრღვევთა“ დაკავების ფაქტები საჩხერის მუნიციპალიტეტის ტერიტორიაზე. რუსი მესაზღვრეები (ზოგიერთი მონაცემით, ქართული ენის მცოდნე ოსებიც) ჯონჯოლის საკრეფად სამაჩაბლოს ტერიტორიაზე გადასულ საჩხერლებს აკავებენ და ცხინვალში გადაჰყავთ. ძირითადად, საჩხერის სოფელ კორბოულიდან მოსახლეობა სეზონურად ცდილობს ჯონჯოლის შეგროვებით თანხის შეგროვებას.
ამჟამად სამწნილედ ვარგისი ამ მცენარის ყვავილის ფასი საკმაოდ დაბალია: ერთი კილოგრამი 3-4 ლარი, თუმცა მოსახლეობა მაინც ცდილობს, სეზონი არ გამოტოვოს და ყოველდღიურად 10-15 კილოგრამი ყვავილის შეგროვებას ახერხებენ.
,,თუ მარჯვედ დაკრეფ, დღეში 50 ლარის გამომუშავებაც შეიძლება, მაგრამ ამ ბოლო პერიოდში ჯონჯოლით სარგებელი ბევრმა ვერ ნახა, რადგან საზღვრის გადაკვეთის შემდეგ 125 ლარით აჯარიმებენ
,,საზღვრისდამრღვევებს“ და ცხინვალშიც თითქმის მშიერი უწევთ ყოფნა დროებით იზოლატორში. მართალია, იქ ქართველებს ფიზიკურ შეურაცხყოფას არ აყენებენ, მაგრამ ერთჯერადი კვების გამო, ფაქტობრივად, მშივრებს უწევთ ყოფნა“,_აცხადებენ საჩხერის მკვიდრები.
,,მომავალი წლისთვის მინდა, რომ საკარმიდამო ნაკვეთებში დავრგო ჯონჯოლი, რომ ტყეში არ მომიწიოს სიარულმა და მერე ცხინვალის ,,მონახულებამ“, მართალია, 2-3 წელი მოუნდება, რომ ბუჩქებმა ნაყოფი მოიტანოს, მაგრამ მაინც ასე მირჩევნია“, - თქვა ჩვენთან საუბარში ერთმა ახალგაზრდამ, რომელმაც სახელ-გვარის გამჟღავნება არ ისურვა.