"პატრიოტთა ალიანსი"-ს ქუთაისის მაჟორიტარობის კანდიდატმა გოგი წულაიამ ქალაქის მერიის წინ თავისი ბანერი გააკრა. ამ მოქმედებით როგორც წულაია ამბობს "ქართული ოცნების" მიერ რიგ ადგილებში ბანერების კანონგარეშედ გაკვრა გააპროტესტა.
"გია თევდორაძის დაწერილი განკარგულების მერე, რომლის მიხედვითაც განათების ბოძებზე ბანერების გაკვრა აიკრძალა, ქალაქის მერია განკარგულებას წერტილ-მძიმით იწერს, თუმცა ამ საარჩევნოდ კანონი პირველმა "ქართულმა ოცნებამ" დაარღვია, რასაც რეაგირება არ მოყოლია,"- განაცხადა წულაიამ.
ქუთაისის მერიის არქიტექტურისა და ზედამხედველობის სამსახურის უფროსის ბაქარ ჭეიშვილის განცხადებით, განკარგულების დარღვევის შემთხვევაში მერია ყველა პარტიას თანაბრად აჯარიმებს.
"არ აქვს მნიშვნელობა რომელი პოლიტიკური პარტია იქნება. ჩვენ ვიცავთ კანონს და კანონის მიხედვით, თუ კი აღმოჩენიდან 5 დღის განმავლობაში ბანერი არ ჩამოიხსნება, კანონის დამრღვევი პარტია დაჯარიმდება,"- ამბობს ჭეიშვილი.
ცნობისთვის, წულაიამ მსგავსი სახით პროტესტი 2014 წელსაც გამოხატა.