თბილისში მიმდინარე მოვლენებს ესტონეთში მცხოვრები საქართველოს მოქალაქეები გამოეხმაურნენ. ტალინის თავისუფლების მოედანზე შეკრებილმა ახალგაზრდებმა 5 ივლისის ძალადობრივი მოვლენები დაგმეს და ოპერატორ ლექსო ლაშქარავას გარდაცვალების გამო, მწუხარება გამოხატეს.
მათი თქმით, რადიკალური დაჯგუფებების მიერ განხორციელებული ძალადობა ქვეყნის დემოკრატიულ ღირებულებებს საფრთხეს უქმნის.
„ როგორც მოქალაქე, ვაპროტესტებ მომხდარ ძალადობასა და ხელისუფლების წამახალისებელ ნაბიჯებს, რამაც რადიკალური ჯგუფების უკონტროლო ქმედებები გამოიწვია. როგორც ჟურნალისტი, ვწუხვარ გარდაცვლილი კოლეგის გამო. მინდა, ქართველ ჟურნალისტებს სოლიდარობა გამოვუცხადო, მედიაზე ძალადობა წარმოუდგენლად შემაშფოთებელია,”-განაცხადა, ესტონურ ჟურნალისტთა კავშირის წევრმა, თეა მარიამიძემ.
შინაგან საქმეთა სამინისტროს ინფორმაციით, 5 ივლისის აქციაზე დაშავდა მედიის 53 წარმომადგენელი. რადიკალური დაჯგუფების წევრების მიერ ნაცემი ერთ-ერთი ოპერატორი, ლექსო ლაშქარავა 10 ივლისს გარდაიცვალა.