ორმაისობასთან დაკავშირებული ღონისძიებები 10 საათიდან დაიწყო და ამ წუთებშიც გრძელდება. თუმცა, აღსანიშნავია, რომ ადგილობრივი ხელისუფლება და მმართველი პარტია ქუთაისობას დამოუკიდებლად აღნიშნავდნენ და ოპონენტებმა „კოჰაბიტაციას“ ვერც ქუთაისობის ხათრით მიაღწიეს.
„ქართული ოცნების“ და „დემოკრატიული საქართველოს“ წარმომადგენლება ორმაისობა ისტორიული ოქროს ჩარდახის ეზოში აღნიშნეს.
„ყველა ქუთაისელს და არამარტო მათ, ვულოცავთ ქუთაისობას. ჩვენ გადავწყვიტეთ, დღევანდელ დღეს განსხვავებულად შევხვედროდით, ამიტომ იმერეთის მეფეთა საზაფხულო რეზიდენციაში, ოქროს ჩარდახში მოვიწვიეთ ქალაქის შემოქმედებითი და სამეცნიერო ინტელიგენცია, მივულოცეთ ერთმანეთს ეს დღესასწაული. გავიხსენეთ წარსული და სამომავლო გეგმებიც დავსახეთ“, - აღნიშნა პარლამენტის წევრმა ომარ ნიშნიანიძემ.
ქუთაისის მაჟორიტარმა დეპუტატმა გუბაზ სანიკიძემ კი დააანონსა, რომ უახლოეს პერიოდში მოხდება პრეზენტაცია იმ პროექტების, რომელსაც მთავრობა ქუთაისში განახორციელებს.
რაც შეეხება სტატუსს, რომლითაც ქუთაისი მომავალ ორმაისობას შეხვდება, სანიკიძის განცხადებით, ჯერ არაა გადაწყვეტილი, შეინარჩუნებს თუ არა ქუთაისი საპარლამენტო ქალაქის სტატუსს.