ბოტანიკურ ბაღში სამუშაოები რამდენიმე თვეა მიმდინარეობს. პროექტი, რომელიც ქუთაისის ბოტანიკური ბაღის ინფრასტრუქტურის რეაბილიტაციასა და კეთილმოწყობას ითვალისწინებს, „დიზაინკომპლექსმა“ შეიმუშავა. სამუშაოებს რეგიონალური განვითარების ფონდი აფინანსებს.
პროექტის ფარგლებში წესრიგდება ბოტანიკური ბაღის გზები, სავალი ბილიკები, წყლის აუზი, ძველი, ისტორიული შენობა და გეოფლორისტული ნაკვეთები.
„ბოტანიკური ბაღი ათწლეულების განმავლობაში მიტოვებული იყო. აქ გასამმაგებულია ვიზიტორთა რაოდენობა, რაც ძალიან კარგია. ბაღი ქალაქში ერთ-ერთი მთავარი დასვენების ადგილია. საერთოდ, აუცილებელია ქალაქში სკვერებისა და მწვანე საფარის რეაბილიტაცია.“-განაცხადა ქუთაისის მერმა, შოთა მურღულიამ დღეს, ბოტანიკურ ბაღში სარეაბილიტაციო სამუშაოების დათვალიერებისას.