დღეს, ,,კომუნიკაციების მარეგულირებელი ეროვნული კომისიის“ საქმიანობის შემსწავლელ დროებით საპარლამენტო კომისიაში, მარეგულირებლის ყოფილ თავმჯდომარეებს დიმიტრი ქიტოშვილს და გიორგი არველაძეს უსმენდნენ. შეხვედრაზე განიხილეს მათი მუშაობის პერიოდში მარეგულირებელ კომისაში განვითარებული მოვლენები. დღეს, ასევე დაგეგმილი იყო ტელეკომპანია ,,ალანიას“ მფლობელების დაკითხვაც, თუმცა, არც ერთი მათგანი კომისიის სხდომაზე არ გამოცხადდა.
დროებითი საპარლამენტო კომისიის თავმჯდომარის თინა ხიდაშელის განცხადებით, კომისიამ ისინი განმეორებით დაკითხვაზე 3 ოქტომბერს დაიბარა და თუ კვლავ არ გამოცხადდებიან, მაშინ, კომისია უფლებამოსილია კანონით მინიჭებული უფლება გამოიყენოს და ,,ალანიას“ მესაკუთრეები იძულების წესით მიიყვანოს სხდომაზე. "დღევანდელი სხდომა ძირითადად 2004 -2009 წლების საქმიანობას შეეხო. განხილვის მთვარი თემა ტელეკომპანია ,,ალანიას“ საკითხი იყო, თუმცა, ტელევიზიის არც ერთი წარმომადგენელი შეხვედრაზე არ გამოცხადდა. იმ შემთხვევაში, თუ ისინი განმეორებით ჩანიშნულ დაკითხვასაც არ დაესწრებიან, გამოვიყენებთ კანონით მონიჭებულ უფლებას და ვაიძულებთ მათ დაკიხვაზე მოსვლას",– განაცხადა თინა ხიდაშელმა.
მისივე თქმით, დაკითხვების შედეგად გამოიკვეთა მარეგულირებლის დისკრიმინაციული მიდგომები ტელევიზიებთან მიმართებაში, კერძოდ, მარეგულირებელი შერჩევით ახდენდა ტელევიზიების სანქცირებას.
"აჯარიმებდნენ ერთ კომპანიას და ვერ ხედავდნენ მეორეს დარღვევებს. თუ რატომ ხდებოდა ეს, ამაზე პასუხი არ აქვთ. ამ დისკრიმინაციულ მიდგომებში ჩართული იყო როგორც მარეგულირებელი, ასევე თვითონ ტელევიზიებიც. სწორედ აქედან დაიწყო პრობლემების მთელი კასკადი. კანონი უნდა იყოს სამართლიანი და არ უნდა ჰყავდეს მსხვერპლები და ფავორიტები“-განაცხადა თინა ხიდაშელმა."