მთავარ პროკურატურაში საგამოძიებო ჯგუფი შეიქმნება. იგი 2008 წლის აგვისტოს ომთან დაკავშირებით სამართლებრივ საკითხებს შეისწავლის. ამის შესახებ მთავარმა პროკურორმა არჩილ კბილაშვილმა საჯაროდ განაცხადა, ამ განცხადებას კი პრეზიდენტის მხრიდან შემდეგი პასუხი მოჰყვა: ერთი წუთით არ ვითანამშრომლებ ამ ანტისახელმწიფოებრივ გამოძიებასთანო.
„ჩვენი ამოცანაა, სამართლებრივ ასპექტში შევისწავლოთ, ჰქონდა თუ არა ადგილი ომის დანაშაულებებს. სხვა ტიპის შესწავლა, რასაც პარლამენტი გააკეთებს, ეს პოლიტიკოსთა უფლება და საგანია, ჩვენ არ შევეხებით, მაგრამ ჩვენ შევქმნით საგამოძიებო კომისიას, რომელიც სამართლებრივ საკითხებს შეისწავლის,“ - განაცხადა არჩილ კბილაშვილმა.
მისივე თქმით, „აღნიშნულ საქმესთან დაკავშირებით დაიკითხება ყველა ის თანამდებობის პირი, ვისაც თემაზე ინფორმირება და შემხებლობა ექნება“.
„ვის მიმართ ჩატარდება საგამოძიებო მოქმედებები, ვინ დაიკითხება და როგორ, ეს ყველაფერი ჯგუფის მიერ შემუშავებული საგამოძიებო გეგმის მიხედვით განხორციელდება. წინასწარ არასწორი იქნება იმის დაანონსება, ესა თუ ის პირი დაიკითხება თუ არა. საქმის გამოძიების კვალობაზე, არ იარსებებს თანამდებობის პირი, რომლის დაკითხვაც საჭიროა და არ დაიკითხოს, ანუ ყველა ის პირი, ვისაც თემასთან ინფორმირება და შემხებლობა ექნება, დაკითხული იქნება,“ - განაცხადა კბილაშვილმა.
საქართველოს პრეზიდენტი კი გამოძიებასთან თანამშრომლობას არ აპირებს და ახალი მთავრობის ინიციატივას - რუსეთ-საქართველოს ომის საკითხები გამოიძიოს - ანტისახელმწიფოებრივად აცხადებს.
„მე, როგორც საქართველოს მოქალაქე და პრეზიდენტი, ვაცხადებ: ერთი წუთით არ ვითანამშრომლებ ამ ანტისახელმწიფოებრივ გამოძიებასთან, რომლის საბოლოო მიზანი საქართველოს სახელმწიფოებრიობის შერყევაა და პირდაპირ არის მიმართული ჩვენი ტერიტორიული მთლიანობის წინააღმდეგ. ახლა, ახალ ვითარებაში, ეს ქმედებები პირდაპირ არის მიმართული ჩვენი მტრის ამოცანების უკვე ბოლომდე შესრულებამდე. მე გული მტკივა, საქმე ეხება არა ჩემს თავს და ჩემს პიროვნებას, ეს მეასეხარისხოვანია, საქმე ეხება ჩვენი ქვეყნის მომავალს.
ჩვენ ყველას გვმართებს განსაკუთრებული მოფრთხილება ჩვენი მომავლის და დაფიქრება იმაზე, თუ რას გავაკეთებთ უახლოეს დღეებში, კვირებში და წლებში,“ - აღნიშნა მიხეილ სააკაშვილმა.
მიხეილ სააკაშვილის განცხადებით, არც ერთ ოფიციალურ პირს, 2008 წლიდან მოყოლებული, გარდა, რუსული ოფიციალური პირებისა და გარდა უგო ჩავესისა, არასოდეს დაუდანაშაულებია საქართველო ომის ინიცირებაში, ომის გაჩაღებაში. ყოველთვის ამ ომის ინიციატორად და აგრესორად გამოყვანილი იყო რუსეთი.
„მოხდა პირველი შემთხვევა, როცა გაჩნდა კიდევ ერთი ოფიციალური პირი, გარდა რუსებისა და ჩავესისა, რომელმაც ეს გააკეთა და, სამწუხაროდ, ჩემთვის, ეს აღმოჩნდა საქართველოს პრემიერ-მინისტრი.
საქართველოს მთავრობა ამბობს, რომ მას უნდა პრაგმატული პოლიტიკის გატარება რუსეთთან. მინდა, ვთქვა, რომ მე ამას მივესალმები, ჩვენც ვცდილობდით ამის გაკეთებას. მაგრამ, ამიხსენით, რა პრაგმატიზმზე შეიძლება იყოს ლაპარაკი, როცა შენი ტერიტორიის ოკუპანტს აძლევ ოკუპაციის იურიდიულ დასაბუთებას,“ - აცხადებს პრეზიდენტი. მისივე თქმით, ეს არის ის შემთხვევა, რასაც მსოფლიო ისტორიაში პრეცედენტი არ აქვს. „გასაგებია, რომ წინა მთავრობა გაასამართლო ღალატისთვის, გაქცევისთვის, ქვეყნის მიტოვებისთვის, ან მოგონილი საბაბით სამხედრო დანაშაულისთვის, მაგრამ უყენებდე ბრალს წინა მთავრობას იმისთვის, რომ წინააღმდეგობა გაუწია მტერს და უკან არ დაიხია...“
ქვეყნის პირველი პირის ადმინისტრაციის ოფიციალური განცხადებით, პრეზიდენტი ემიჯნება პრემიერ-მინისტრ ბიძინა ივანიშვილის განცხადებას, რომ აგვისტოს ომის გაჩაღება საქართველოს ბრალი იყო. საქართველოს პრემიერ-მინისტრი ბიძინა ივანიშვილი კი საპირისპიროს ამტკიცებს და ოფიციალურად განმარტავს - მას არასოდეს უთქვამს, რომ აგვისტოს ომში საქართველო იყო აგრესორი და ომი მან დაიწყო.
„2008 წლის აგვისტოს ომთან დაკავშირებით მინდა განვაცხადო - მე არასოდეს მითქვამს, რომ საქართველო იყო აგრესორი და ომი დაიწყო. ჩვენს ჯარს არ გადაუკვეთავს სხვა ქვეყნის საზღვარი და არ გადასულა სხვა ქვეყნის ტერიტორიაზე. სწორედ რუსეთმა დაარღვია სუვერენული სახელმწიფოს ტერიტორიული საზღვრები და განახორციელა აგრესია ჩვენი ქვეყნის წინააღმდეგ, რასაც ჩვენი ტერიტორიების ოკუპაცია მოჰყვა. მაგრამ, ამის მიუხედავად, ჩვენი ვალია, უპასუხოდ არ დარჩეს არც ერთი კითხვა, რომელიც აღელვებს ჩვენს საზოგადოებას,“ - აცხადებს პრემიერ-მინისტრი.
ბიძინა ივანიშვილი ამბობს, რომ ბევრი კითხვა არსებობს აგვისტოს ომთან დაკავშირებით - რატომ ვერ შეძლო სააკაშვილმა აშკარა პროვოკაციის თავიდან აცილება, როგორ მოქმედებდა მთავარსარდალი და მთავრობა, რატომ ერეოდნენ ხელისუფლების მაღალი რანგის წარმომადგენლები სამხედრო ოპერაციის მართვაში, რამაც ქაოსი და არეულობა გამოიწვია, რატომ მოჰყვა ამხელა მსხვერპლი სამოქალაქო მოსახლეობას შორის, რატომ ვერ შეძლო მთავრობამ მშვიდობიანი მოსახლეობის ევაკუაცია, როგორ დარჩნენ მეთაურის გარეშე ჩვენი რეზერვისტები, რომლებიც შემთხვევით გადაურჩნენ სიკვდილს და მრავალი სხვა.
„კითხვები მხოლოდ პოლიტიკური ხელმძღვანელობის - მთავარსარდლისა და მთელი მთავრობის მიმართ ისმება და ისინი ვალდებული არიან, კანონის წინაშე გასცენ პასუხი ამ კითხვებს. ვფიქრობ, დამთავრდა ის დრო, როდესაც სააკაშვილი თავად განსაზღვრავდა, ვის უნდა ეპასუხა ხალხისთვის მტკივნეულ კითხვებზე და ვის - არა. ერთხელ და სამუდამოდ საქართველოში უნდა დამთავრდეს ეპოქა, როდესაც ქვეყნის მმართველი კანონზე მაღლა აყენებს თავს. ახლა კანონის უზენაესობა არის მთავარი და ყველას, მათ შორის - პრეზიდენტს, იმდენჯერ მოუწევს დაკითხვაზე მისვლა, რამდენჯერაც საჭირო იქნება. ის, რომ სააკაშვილი რუსეთის პროვოკაციას წამოეგო, უდავოა, თუმცა არც რუსეთი აღმოჩნდა ამ პროვოკაციით მოგებული და, იმედია, ამას კარგად აცნობიერებენ თავად რუსეთშიც. მჯერა, რომ სწორი, დიპლომატიური და გააზრებული ნაბიჯებით ჩვენი ქვეყანა აუცილებლად შეძლებს ოკუპირებული ტერიტორიების დაბრუნებას,“ - აცხადებს ივანიშვილი და ამბობს, რომ პრეზიდენტს იმდენჯერ მოუწევს დაკითხვაზე მისვლა, რამდენჯერაც საჭირო იქნება.
საპარლამენტო უმრავლესობის წევრი, რესპუბლიკელი ლევან ბერძენიშვილი ირწმუნება, რომ საქართველოს პრეზიდენტი მიხეილ სააკაშვილი გამოძიებასთან აუცილებლად ითანამშრომლებს.
„ის ვალდებულია, ითანამშრომლოს გამოძიებასთან. ჩემი აზრით, ამ განცხადების გაკეთება სააკაშვილის მხრიდან არაადეკვატური იყო. გარწმუნებთ, ის აუცილებლად ითანამშრომლებს გამოძიებასთან. ზოგადად, აგვისტოს ომის გამოძიება სააკაშვილის დროს დაიწყო, არსებობს ომის სტატუტი, რომლის თანახმადაც, ჩვენ ვალდებული ვართ ეს გამოძიება ვაწარმოოთ, წინააღმდეგ შემთხვევაში მას ჰააგა გამოიძიებს და, ზოგადად, დაკითხვაზე დაბარება ბრალის წაყენებას არ ნიშნავს. გამოძიება დაიწყება და ამაში გასაოცარი არაფერია,“ - განაცხადა ბერძენიშვილმა.
საპარლამენტო უმრავლესობის ერთ-ერთი ლიდერის თინა ხიდაშელის განცხადებით კი, „სააკაშვილისთვის არავის უთქვამს, დამნაშავე ხარო, ეტყობა მასში რაღაც ქვეცნობიერი ლაპარაკობს და საკუთარი შიშები აწუხებს. მე არ მესმის, როგორ შეიძლება, ქვეყნის მთავარსარდლის ინტერესებში არ იყოს ის, რომ აგვისტოს ომის დროს ჩადენილი დანაშაულები იყოს გამოძიებული.“
„საუბარი იმაზე, რომ საქართველოს ხელმძღვანელობის გადაწყვეტილებამ რუსეთის საპასუხო რეაქცია გამოიწვია, აქამდე ეს რუსეთის პოზიცია იყო, ახლა ასეთ ქვეყანათა რიცხვი გახდა ორი და ამ პოზიციას შეუერთდა საქართველო და მისი პრემიერი-მინისტრი ბიძინა ივანიშვილი,“ - აცხადებს საპარლამენტო უმცირესობის წევრი ნუგზარ წიკლაური, რომელმაც რუსეთის საგარეო საქმეთა მინისტრის სერგეი ლავროვის მიერ გაკეთებულ განცხადებაზეც ისაუბრა და აღნიშნა - ის, რომ ლავროვმა ივანიშვილის გუშინდელ განცხადებას პოზიტიური და პრაგმატული უწოდა, რაც გასაკვირი სულაც არ არის.
„ლავროვი თავისი სახელმწიფოს სახელით საუბრობს, თუ რა საპასუხო შედეგებს უნდა ელოდოს საქართველო პრემიერის ამ განცხადების შემდეგ. ლარვოვი ამბობს, რომ კულტურული და სავაჭრო ურთიერთობები უნდა განვავითაროთ, მაგრამ აღიარებული ტერიტორიების უკან წაღებაზე საუბარი არ იქნება, ჩვენ მივიღეთ ვითარება, როდესაც პრემიერი აგრესიაში თავის საკუთარ ქვეყანას ადანაშაულებს და მეორეს მხრივ, ლავროვმა თქვა, რომ ამ მოღალატეობრივი ნაბიჯის საპასუხოდ, თქვენ შეგიძლიათ შემოიტანოთ ნიახური, მწვანილი, ღვინო, გამოგზავნოთ თქვენი ანსამბლები, სამაგიეროდ ჩვენ გამოგიგზავნით ნატაშა კალარევას, აგუტინს და რუსული ესტრადის სხვა წარმომადგენლებს. აი, სწორედ ეს არის საქართველოს ხელისუფლების გადაწყვეტილების ფასი,“ - განაცხადა წიკლაურმა.
2008 წლის აგვისტოს ომთან დაკავშირებული მოვლენების საფუძვლიანი გამოძიება ოპონენტებისგან განსხვავებით, საქართველოს ახალ ხელისუფლებას სულაც არ მიაჩნია რუსეთის წისქვილზე წყლის დასხმად. პარლამენტის ვიცე-სპიკერის მანანა კობახიძის განცხადებით, აფხაზეთისა და სამხრეთ ოსეთის ოკუპაციის ფაქტი უდავოა, ხოლო ის, რომ საქართველო რუსეთთან ურთიერთობების გაუმჯობესებას ცდილობს, აბსოლუტურად არ უშლის ხელს საქართველოს მთავარ მიზანს - ევროპულ და ევროატლანტიკურ მისწრაფებებს.
„ლავროვს, რა თქმა უნდა, უფლება აქვს თავისი აზრი ჰქონდეს სააკაშვილზე, ახალ ხელისუფლებაზე, მაგრამ ჩვენ ორიენტირებული ვართ არა იმაზე, თუ ლავროვი რა განცხადებებს გააკეთებს, არამედ საქართველოს ინტერესებზე. ამ შემთხვევაში სააკაშვილის ქმედებას როგორ აფასებს ლავროვი მეორეხარისხოვანია, მთავარია ჩვენი საზოგადოება როგორ შეაფასებს,“ - აცხადებს საქართველოს პარლამენტის ვიცე-სპიკერი.
მისივე თქმით, 2008 წლის ომის შესახებ კითხვები ეხება იმას, რამდენად ადეკვატური იყო ხელისუფლების მოქმედებები, როგორც აგვისტოში, ისე წინა პერიოდში,
„შესაბამისად, ეს არ ნიშნავს იმის აღიარებას, რომ რუსეთი მართალია. ის, რომ რუსეთმა საქართველოს ტერიტორიაზე აგრესია განახორციელა და მისი ოკუპაცია მოახდინა, უაპელაციოა, ამ საკითხზე არავინ დაობს. საუბარია იმაზე, რომ საკუთარი ხელისუფლების მიმართ, როგორც საზოგადოებას, ასევე მოქმედ მთავრობას შეიძლება, კითხვები გააჩნდეს. მეორეხარისხოვანია ამას ლავროვი რა ინტერპრეტაციას მისცემს,“ - ასეთია მანანა კობახიძის პოზიცია.
„ინტერპრესნიუსთან“ საუბარში ექსპერტთა კლუბის პრეზიდენტის სოსო ცისკარიშვილის თქმით, ქვეყნისთვის უკეთესი იქნება, თუ სააკაშვილი გამოძიებასთან ითანამშრომლებს, რადგან ასეთი გამოძიების აუცილებლობა წარმოჩინდა მას შემდეგ, რაც ჰააგის სასამართლოს პროკურორების მხრიდან გამოთქმული იქნა პრეზიდენტ სააკაშვილთან გასაუბრების ინტერესი და ასეთი ვალდებულება სწორედ იუსტიციის სამინისტრომ იკისრა.
„ეჭვი არ მეპარება, რომ ჩვენი ქვეყნის პრესტიჟისთვის ბევრად უკეთესი იქნება, თუ საქართველოს პრეზიდენტი გამოძიებასთან თანამშრომლობის სურვილს თავად გამოთქვამს. ამით ჩვენ უფრო შევინარჩუნებდით იმიჯს საერთაშორისო ასპარეზზე, ვიდრე ჩვენს პრეზიდენტს დაკითხავს რომელიმე პროკურორი ჰააგის სასამართლოდან. ქვეყნისთვის ეს უფრო სამარცხვინო იქნებოდა,“ - აცხადებს ექსპერტთა კლუბის პრეზიდენტი სოსო ცისკარიშვილი.