20-22 აგვისტოს საქართველოში ეუთო-ს საპარლამენტო ასამბლეის დელეგაცია ჩამოვა. მათი ვიზიტის მთავარი მიზანი წინასაარჩევნო პერიოდში არსებული ვითარების გაცნობაა.
დელეგაციის შეხვედრები დაგეგმილია პოლიტიკური პარტიების წარმომადგენლებთან, საერთაშორისო და ადგილობრივ სადამკვირვებლო ორგანიზაციებთან, ცესკო-სა და უწყებათაშორის კომისიასთან, ასევე, არასამთავრობო ორგანიზაციების წარმომადგენლებთან.
საინფორმაციო სააგენტო „ინტერპრესნიუსის“ ცნობით, დელეგაციის წევრები საქართველოს პრეზიდენტს, პარლამენტის წევრებსა და დიპლომატიური კორპუსის წარმომადგენლებსაც შეხვდებიან.
ეუთო-ს საპარლამენტო ასამბლეის პრეზიდენტი, იტალიის პარლამენტის წევრი რიკარდო მილიორი საქართველოს ამ რანგში პირველად ეწვევა. ის ასამბლეის პრეზიდენტად ივლისში აირჩიეს.
ეუთო-ს საპარლამენტო ასამბლეა 56 ქვეყნის პარლამენტის 400-ზე მეტ წევრს აერთიანებს. ივლისში მონაკოში გამართულ სესიაზე ეუთო-ს საპარლამენტო ასამბლეამ საქართველოს მხარდამჭერი რეზოლუცია მიიღო, სადაც აღნიშნულია რუსეთის მიერ საქართველოს ტრიტორიების ოკუპაცია და გამოხატულია საქართველოს ტერიტორიული მთლიანობის მხარდაჭერა.