15 წლის წინ, 1995 წლის ოქტომბერში გაზეთ „P.S.“-ის („პოსტსკრიპტუმის“) პირველი ნომერი გამოვიდა.
ეს იყო იმერეთის რეგიონში ერთ-ერთი პირველი, მრავალგვერდიანი დამოუკიდებელი გაზეთი, რომელმაც იმთავითვე მიზნად დაისახა საზოგადოებრივ-პოლიტიკური პროცესების პირუთვნელი ჩვენება, დაჩაგრულის დაცვა, ეროვნული ტრადიციების გაფრთხილება, თავისუფალი სიტყვისა და მომავლის მსახურება.
მოკლე ხანში „P.S.“ ყოველკვირეულ გაზეთად გადაიქცა, გარს შემოიკრიბა პროფესიონალ ჟურნალისტთა ძლიერი გუნდი და კიდევ უფრო შემტევი გახდა კორუფციის, უსამართლობის, განუკითხაობის, რუტინის მიმართ. გაზეთს არაერთი სასამართლო პროცესი ჰქონია თავგასული მოხელეების წინააღმდეგ, არაერთხელ დაუმტკიცებია თავისი სიმართლე და პირუთვნელობა.
2001 წელს „P.S.“-მა პრესის რესპუბლიკურ ფესტივალზე „საუკეთესო რეგიონული გაზეთის“ სტატუსი და პრიზად „ოქროს კალამი“ მიიღო.
არსებობის 15 წლის მანძილზე გაზეთ „P.S.“-ის რედაქციაში დაფრთიანდა ჟურნალისტთა არაერთი თაობა, რომელიც დღეს წარმატებით განაგრძობს მოღვაწეობას ქართულ მედიასივრცეში.
„P.S.“-მა საერთაშორისო ინსტიტუტების ფინანსური მხარდაჭერით მრავალი წარმატებული პროექტი განახორციელა, რითაც თავისი მნიშვნელოვანი წვლილი შეიტანა რეგიონში დემოკრატიული ფასეულობების ჩამოყალიბებისა და დამკვიდრების პროცესში. გაზეთი „P.S.“ მრავალჯერ მდგარა ფინანსური პრობლემების წინაშე, თუმცა, დამოუკიდებლობა და სიტყვის თავისუფლება არასოდეს გაუცვლია სხვა ფასეულობებზე, მას არასოდეს შეუწყვეტია აქტიური საქმიანობა და დღესაც ძველებური შემართებით განაგრძობს მკითხველთან ურთიერთობას.
მადლობა თითოეულ მკითხველს, ვინც ყოველ ორშაბათს მოუთმენლად მოელის ჩვენთან შეხვედრას! მადლობა ჩვენს საზოგადოებას, რომელსაც მიაჩნია, რომ „P.S.“ ერთ-ერთი საუკეთესო გაზეთია! და მადლობა თითოეულ ჟურნალისტს, რომელსაც სხვადასხვა დროს პროფესიული კეთილსინდისიერებით უღვაწია ჩვენს რედაქციაში.
„P.S.“ არ გიმტყუნებთ!
„P.S.“ მუდამ თქვენთან იქნება, ძვირფასო მკითხველო!
თქვენი რჩეული გაზეთი „P.S.“
„P.S.“ – 15
ჩვენ და მკითხველი
* * *
ეს ის გაზეთია, რომელიც იბრძვის. მაგრამ უფრო და უფრო მეტი ბრძოლაა საჭირო, რომ გადავრჩეთ.
ოტია იოსელიანი
* * *
„P.S.“ კარგი გაზეთია და ჩემი რჩევა იქნება ქუთაისელი მკითხველისადმი: მეტი ყურადღება გამოიჩინონ მის მიმართ. ასეთი გაზეთი ბევრი არ გამოდის. ახლა მთელი პრესა გაჯერებულია იმით, რომ გალანძღონ ვიღაცა და აგინონ პირდაპირი სიტყვებით. მაგრამ ეს გაზეთი ამას არ კადრულობს, თუმცა დიდი კრიტიკაც იბეჭდება შიგ.
ჩემი რჩევა იქნება თქვენდამი ერთი: კროსვორდი დაბეჭდეთ ერთ გვერდზე მთლიანად, გაადიდეთ. კაი კროსვორდს აკეთებს ეს ვიღაცაა.
რეზო ჭეიშვილი
* * *
წლები მაკავშირებს „P.S.“-თან. ეს არის გაზეთი, რომელსაც დიდი რისკის ფასად არაერთხელ დაუცავს სიმართლე. ინტერვიუები, რეპორტაჟები, პრობლემური სტატიები, რომლებიც მის ფურცლებზე იბეჭდება, ყოველთვის საინტერესო და აქტუალურია. სიამოვნებით ვიგონებ ფაქტს, როცა ერთ წელიწადს გაზეთმა „საუკეთესო ადვოკატის“ ნომინაცია მომანიჭა და სიმბოლური საჩუქარიც მომიძღვნა: ჯაჭვებგაწყვეტილი დიდი დათუნია, ამით კი ჟურნალისტური ხერხიანობით მიმანიშნა, თუ რას ნიშნავს თავისუფლება ტუსაღისათვის... გმადლობთ, „P.S.“-ელებო“, მარად თქვენს მეგობრად ვრჩები.
ზურაბ როსტიაშვილი,
ადვოკატი
* * *
დაარსების დღიდანვე თქვენი გაზეთის დიდი გულშემატკივარი და მეგობარი ვარ. ჩვენს შორის ხომ განსაკუთრებული სითბოა. „P.S.“-ში არაერთხელ ასახულა ჩვენი ანსამბლის წარმატებები, ფაქტობრივად, გაზეთის ფურცლებზე ჩვენი შემოქმედებითი მატიანე შეიქმნა. დარწმუნებული ვარ, როგორც ყოველთვის, გაზეთი მომავალშიც გვერდით დაგვიდგება და ჩვენ ერთად გავაკეთებთ იმ დიდ, კეთილშობილურ საქმეს, რასაც ძირძველი ქართული ფოლკლორის შენარჩუნება და პროპაგანდა ჰქვია.
ჩვენო ძვირფასო მეგობრებო! გილოცავთ 15 წლის იუბილეს და გისურვებთ, „P.S.“-ის მართალი სიტყვა მუდამ ამშვენებდეს ქართულ მედიას!
ზეინაბ ბურჯანაძე,
ფოლკლორის ცენტრი - სიმღერისა და ცეკვის ანსამბლის დირექტორი
* * *
თქვენი გაზეთის აქტიური მკითხველი ვარ. ძალიან დიდი პატივს ვცემ თქვენს რედაქციას და მომწონს თქვენი დამოკიდებულება ამ პროფესიისადმი. ყოველთვის ვამბობდი და ვამბობ: პრესამ, ჟურნალისტურმა სფერომ, ჩვენ, ხელისუფლების წარმომადგენლებს, არ უნდა მოგვცენ შეცდომის დაშვების უფლება, უნდა გვაკრიტიკონ სამართლიანად და ობიექტურად. გილოცავთ ყველა თანამშრომელს გაზეთის იუბილეს და გისურვებთ წარმატებებს.
ამირან ხვადაგიანი,
თვითმმართველი ქალაქ ქუთაისის საკრებულოს თავმჯდომარე
* * *
ვისთვის როგორ, ჩემთვის კი „P.S.“ ქალაქის მთავარი გაზეთია. ეს აზრი 15 წლის განმავლობაში ჩამომიყალიბდა, როგორც ფაქტი და მოცემულობა. მიზეზი შესაძლოა სუბიექტური იყოს (ნატო გუბელაძე და ნანული ცხვედიანი ჩემი მეგობრები არიან), ან ობიექტური (მაღალი პროფესიონალიზმი, პრინციპულობა და მიუკერძოებლობა); როგორც არ უნდა იყოს, ამ გაზეთის გარეშე ჩემს ქალაქს ერთი მნიშვნელოვანი მახასიათებელი აკლდება. ვუსურვებ მთელ ქუთაისს და საკუთარ თავსაც, რომ ჩვენი ქალაქი ამ მახასიათებლის გარეშე არ დარჩენილიყოს.
მერაბ გვაზავა,
ქუთაისის სამეცნიერო ბიბლიოთეკის დირექტორი
* * *
ლადო მესხიშვილის სახელმწიფო თეატრის მსახიობები და პირადად მე აქტიურად ვთანამშრომლობთ გაზეთ „P.S.“-თან. მოხარული ვარ, რომ თქვენი გუნდი პროფესიონალებით არის დაკომპლექტებული. დარწმუნებული ვარ, ჩვენი ურთიერთობა მომავალშიც გაგრძელდება, სიამოვნებით ვითანამშრომლებთ. გისურვებთ ძალიან ბევრ მკითხველს და ფინანსურად გაძლიერებას!
გიორგი სიხარულიძე,
ლადო მესხიშვილის სახელმწიფო თეატრის მმართველი
* * *
გაზეთ „P.S.“-ს დაბადების 15 წლის თავს ვულოცავ. ვუსურვებ, არასოდეს დაღლილიყოს სიმართლისათვის ბრძოლაში - მან ხომ სწორედ თავისი პირდაპირობით და უკომპრომისობით დაიმკვიდრა ღირსეული ადგილი დღევანდელ თავისუფალ მედიაში...
ასევე ვუსურვებ ფინანსურ სიძლიერეს, რათა დღევანდელი მაღალი სტანდარტებისა და ტექნოლოგიების ეპოქაში, შეძლოს და ღირსეული კონკურენცია გაუწიოს სხვა მედიასაშუალებებს.
გისურვებთ მკითხველთა სიმრავლეს.
ნინო თვალთვაძე
საია-ს ქუთაისის ფილიალის თავმჯდომარე
* * *
მინდა, „P.S.“-მა ბოლომდე შეინარჩუნოს პრინციპი ემსახუროს სიმართლეს. იგი ხალხისაა და ვალდებულია დაიცვას ხალხის ინტერესები.
მიყვარხართ თითოეული თქვენგანი, პატივს ვცემ თქვენს ყოველდღიურ შრომას, სისპეტაკეს, ძიებას.
ეცადეთ, არ გაგიტაცოთ მარტო კრიტიკამ. სიკეთესაც დანახვა სჭირდება, წახალისება და სამაგალითოდ ქცევა.
მწამს და მჯერა, რომ გაამართლებთ საქმეს, რომელსაც ემსახურებით და საზოგადოებაში თავს დაიმკვიდრებთ, როგორც მქადაგებელნი ჭეშმარიტებისა.
იხარეთ, აღმავლობის გზით გევლოთ.
თეიმურაზ ლანჩავა,
საქართველოს მწერალთა კავშირის იმერეთის რეგიონული ორგანიზაციის თავმჯდომარე, საზოგადოება „ქუთაისელის“ ვიცე-პრეზიდენტი
* * *
დღეს საქართველოში უამრავი გაზეთი, ჟურნალი, სხვადასხვა სახის პერიოდული გამოცემა გამოდის. ძალიან ძნელია, აქედან რომელიმე პერიოდულმა ორგანომ თავისი გამორჩეული ადგილი დაიმკვიდროს. თუმცა, გაზეთმა „P.S.“-მა (ამას ვამბობ არა იმიტომ, რომ გაზეთი იუბილარია), დღეს მართლაც შეძლო თავისი თვითმყოფადი სახის დამკვიდრება ქართულ პერიოდულ გამოცემათა მრავალფეროვნებაში.
გისურვებთ, რომ მომავალშიც ისეთივე აქტიურად და სიმართლით მდგარიყავით ჩვენი ცხოვრების მატიანის შექმნაში, როგორც ამას დღემდე აკეთებდით.
ავთანდილ ნიკოლეიშვილი,
აკაკი წერეთლის სახელმწიფო უნივერსიტეტის ქართული ლიტერატურის დეპარტამენტის ხელმძღვანელი, პროფესორი, აკადემიკოსი
* * *
დამოუკიდებლობის გამოცხადების შემდეგ ჩვენი უნიათობისა თუ გარეშე ძალების ზეწოლის შედეგად, ქვეყნისდა საზიანოდ, ყველა პოლიტიკურმა და კულტურულმა ცენტრმა დედაქალაქში მოიყარა თავი. შესაბამისად: რეგიონებში სასიცოცხლო იმპულსები შესუსტდა. სწორედ ასეთ ვითარებაში მოახერხა გაზეთმა „პოსტსკრიპტუმმა“, გამხდარი-ყო აქტუალური, საინტერესო და აკადემიური ორგანო. ანალოგიური ხასიათის ჟურნალ-გაზეთი საქართველოში თითზე ჩამოსათვლელია. ყოველივე ეს მიღწეულია უდიდესი ძალისხმევისა და უაღრესად აკადემიური სარედაქციო ჯგუფის თავდაუზოგავი მუშაობის შედეგად. ასეთი გამოცემები დეზორიენტირებული საზოგადოების მნიშვნელოვან ნაწილს ჰაერივთ სჭირდება. ამიტომ გულწრფელად გილოცავთ საიუბილეო თარიღს. მრავალი მოგველოცოს.
ლუკა დვალიშვილი,
ქუთაისის აკაკი წერეთლის სახელმწიფო უნივერსიტეტის ასოცირებული პროფესორი
* * *
15 წელი თითქოს არც ისე ბევრია ბეჭდური გამოცემისთვის, მაგრამ ამ პერიოდის განმავლობაში გაზეთ „P.S.“-მა შეძლო საკუთარი, განსაკუთრებული ადგილის დამკვიდრება ქართულ მედია სივრცესა და მკითხველთა ცნობიერებაში. თქვენ ყოველთვის გამოირჩეოდით გასაშუქებელი საკითხების მრავალმხრივი სპექტრით, საინტერესო ავტორებითა და ანალიტიკური სტატიებით, წამოჭრილი პრობლემების აქტუალურობითა და ობიექტურობით.
გისურვებთ წარმატებით გაგეგრძელებინოთ 15 წლის განმავლობაში დამკვიდრებული და გამოცდილი ტრადიციები.
პროფ. გიორგი ღავთაძე
აკაკი წერეთლის სახელმწიფო უნივერსიტეტის
რექტორის მოვალეობის შემსრულებელი
* * *
თანამედროვე გაზეთისათვის 15 წელი ნამდვილად არ არის თინეიჯერული ასაკი. მოახერხო ჩვენს დროში ოპერატიულობა და სამართლიანობა, არ ჩამორჩე დროს და ღირსეულად თქვა სათქმელი, მხოლოდ გონებადამჯდართ ძალუძთ. თქვენ სწორედ ასეთები ხართ...
გაიზარდეთ, გაძლიერდით, გამდიდრდით, გაიხარეთ და გაგვახარეთ...
თამარ ღვინიანიძე,
ტელეკომპანია „რიონის“ გენერალური დირექტორი
* * *
სულითა და გულით მოგილოცავთ იუბილეს. 15 წლიანი გაზეთის არსებობა უკვე მეტყველებს მის წარმატებულობასა და ხალხის განუყოფელ ნაწილად ქცევაზე. იმედი მაქვს, რომ გაზეთი „P.S.“ კიდევ ბევრი წელი იქნება არაერთი მკითხველის განუყრელი მეგობარი, საინტერესო სიახლეებით გაგვანებივრებს. ჩემი თანამშრომლობა გაზეთ „P.S.“-თან გარემოს დაცვის კუთხით შედგა და ეს ურთიერთობა იყო საინტერესო, კონსტრუქციული.
მაკა ხეცურიანი,
ასოციაციის „ქალები რეგიონების განვითარებისთვის“ პრეზიდენტი
* * *
მე მიყვარს თქვენი გაზეთი! ვუსურვებ მთელ მის ნიჭიერ კოლექტივს შემოქმედებით წინსვლას, ობიექტურობას და შეუპოვრობას! არ მოგწყენოდეთ ამ ქალაქისა და ქვეყნისთვის დაუღალავი შრომა! თქვენ განსაზღვრავთ წესიერებას და გემოვნებას! ესე იგი, სამოქალაქო საზოგადოების ჩამოყალიბებისთვის პრესაა შეუცვლელი და ძალიან მნიშვნელოვანი ფაქტორი! იღვაწეთ სიყვარულით!
შორენა ჯანაძე,
ექიმი-რადიოლოგი
* * *
ვფიქრობთ, გაზეთმა თავიდანვე აიღო სწორი გეზ-მიმართულება - საერთო-სახალხო საქმის მსახურება, - არა მხოლოდ ქალაქის, არამედ მთელი ქვეყნის მასშტაბით: სოციალურ-პოლიტიკური მწვავე საკითხების წინ წამოწევით, ამასთან ყურადღების მიღმა არ რჩება სულიერ-ზნეობრივი, მხატვრულ-ესთეტიკური, მოზარდი თაობის აღზრდისა და სწავლა-განათლების, ღვაწლმოსილ ადამიანთა წარმოჩენისა და პატივგების, ახალი წიგნების მკითხველისათვის წარდგენისა და მათი პირუთვნელი შეფასების საკითხები და ა.შ.
გულითადად მივესალმებით და ვუსურვებთ „P.S.“-ის ჟურნალისტთა კორპუსს, იარონ წინ, ახალ სიმაღლეთა დასაპყრობად, სახელისა და ავტორიტეტის აღმატებით!
მარი ხვედელიძე,
სახალხო განათლების წარჩინებული მუშაკი
სიმონ არველაძე,
მწერალი, ფილოსოფიის პროფესორი, ქუთაისის საპატიო მოქალაქე
* * *
არსებობის 15 წლის მანძილზე გაზეთმა გამოიარა დრო, რომელიც ყოველი მხრივ რთული იყო ქვეყნისა და საზოგადოებისათვის. ამ ხნის განმავლობაში, სხვადასხვა მიზეზის გამო, ქუთაისში ძალიან ბევრი გაზეთი და ჟურნალი გამოვიდა და დაიხურა. თქვენ ამ გამოწვევას გაუძელით, გადარჩით და თამამი ნაბიჯებით განაგრძობთ სვლას მშობლიური ქალაქისა და ქვეყნის საკეთილდღეოდ.
ზუსტად იცით, რას სთავაზობთ მკითხველს და მკითხველიც გაუწბილებლად ელოდება მას, რისი მიღებაც სურს... გაზეთს მკვეთრად გამოხატული პოზიცია აქვს და სხვას არ ჰგავს...
გულითადად გილოცავთ საიუბილეო თარიღს. გისურვებთ, კიდევ ბევრი გაგეკეთებინოთ ქუთაისის და ჩვენი ქვეყნის საკეთილდღეოდ.
თემურ ძიძიგური,
ცხვირის ქირურგიული ცენტრის დირექტორი, ქირურგი
* * *
„P.S.“-სადმი ჩემი დამოკიდებულება განსაკუთრებულია. ამას განაპირობებს მუდმივმოქმედი რუბრიკა „ჩვენი ენა ქართული“, რომლის საშუალებითაც გაზეთი ხელს უწყობს საზოგადოებას, გააცნოს: სულხან-საბას მარგალიტები, უცხოური ტერმინოლოგიის განმარტებები და ყველაზე მნიშვნელოვანი - როგორ ვიმეტყველოთ სწორად.
ვუსურვებ გაზეთს წარმატებებს. კიდევ დიდხანს ეღვაწოს ჩვენი ქვეყნის სასიკეთოდ და საკეთილდღეოდ!
რუსუდან საღინაძე,
აკაკი წერეთლის სახელმწიფო უნივერსიტეტის ქართული ენის დეპარტამენტის ასოცირებული პროფესორი
* * *
მიხარია, რომ ჩემი ცხოვრების რაღაც ეტაპი დაკავშირებული იყო გაზეთ „P.S.“-თან და ეს იყო ერთ-ერთი კარგი პერიოდი ჩემს ცხოვრებაში. დღემდე და ყოველდღიურად თვალყურს ვადევნებ თქვენს პროფესიულ ნაბიჯებს. პრაქტიკულად, რაკი ერთ საქმეს ვემსახურებით, საერთო ჭირი და ლხინი გვაქვს და გვეცნობა ის პრობლემები, რა გარემოშიც ვიმყოფებით, - ამიტომ გისურვებთ გამძლეობას და მკითხველთა დიდ არმიას!
ია ბობოხიძე,
„ახალი გაზეთის“ მთავარი რედაქტორი
* * *
15 წელი მედია საშუალებისთვის არცთუ პატარა თარიღია, მით უფრო საქართველოში. პირობებში როცა მედიას უწევს „ბრძოლა“ თავის დამკვიდრების, დამკვიდრებულის შენარჩუნების და ახალი მიღწევებისთვის. გაზეთმა „პოსტსკრიპტუმმა“ ეს შეძლო! 15 წლის მანძილზე არაერთი სიძნელის მიუხედავად, გაზეთის ფურცლები ყოველთვის სიახლეს, ანალიტიკას და, ხშირად, მახვილ და განჭვრეტილ სიტყვას სთავაზობდა მკითხველს. მიხარია, რომ მომეცა საშუალება, მოგილოცოთ საიუბილეო თარიღი. გისურვებთ დღეგრძელობას და მკითხველთა ურიცხვ არმიას.
საუკეთესო სურვილებით - ქეთევან ბერძენიშვილი
რადიო „ძველი ქალაქის“ პროგრამების დირექტორი
P.S. წლევანდელი წელი, რადიო „ძველი ქალაქისთვისაც“ საიუბილეოა და ზუსტად იმდენისა ვართ, რამდენისაც გაზეთი „პოსტსკრიპტუმი“
* * *
გარკვეული ხნის განმავლობაში „P.S.“ ჩემი სახლიც იყო, სადაც ყოველთვის მხარდაჭერა და სითბო მხვდებოდა, როგორც ნამდვილ სახლში.
იუბილე განვლილი გზის გადაფასებისა და ახალი მიზნების დასახვის კიდევ ერთი საბაბია. 15 წლის განმავლობაში „P.S.“-მა მრავალი ადამიანის ცხოვრება და ცნობიერება შეცვალა, ბევრი პრობლემის გადაწყვეტას შეუწ-ყო ხელი. მაგრამ ჩემთვის, „P.S.“ პირველ რიგში არის გამოცემა, სადაც მნიშვნელოვანი ადგილი კულტურას უკავია: ლიტერატურა, კინო, თეატრი, მხატვრობა - ხელოვნება და ადამიანები, რომლებიც ქმნიან მას. „P.S.“ - ეს არის გამოცემა, რომელსაც აინტერესებს და სტკივა ქართული კულტურის წინაშე არსებული პრობლემები, მისი განვითარების შესაძლო გზები და პერსპექტივები.
გისურვებთ, ყოველთვის საინტერესო, ახალი და ბევრისთვის „სახლი“ ყოფილიყავით.
თამთა თურმანიძე,
კინომცოდნე