დღეს აკაკი წერეთლის სახელმწიფო უნივერსიტეტის პირველი კორპუსის ფოიეში მარტვილის წმინდა ნინოს დედათა მონასტერში შექმნილი თექის, გობელენებისა და ხელთნაკეთი ნივთების გამოფენა-გაყიდვა გაიმართა.

უნივერსიტეტის პროფესორ-მასწავლებლებმა, სტუდენტებმა, ქუთაისის საზოგადოებრიობის წარმომადგენლებმა მაღალი შეფასება მისცეს მონასტრის დედებისა და მორჩილების ნამუშევრებს, განსაკუთრებით - თექაში შესრულებულ ულამაზეს ნატურმორტებსა და კომპოზიციებს, ეროვნული თვითმყოფადობით გამორჩეულ გობელენებს. ნამუშევრების ნაწილი გაიყიდა კიდეც და - საკმაოდ იაფად.

გამოფენის მაღალი მხატვრული დონით აღფრთოვანებული საზოგადოება ცალკეული ნამუშევრების ავტორებს კითხულობდა, რაზეც დედებისაგან პასუხად მიიღეს, რომ ეს მთლიანი შემოქმედება მონასტრის სახელითაა წარმოდგენილი და, საერო პირებისაგან განსხვავებით, ინდივიდუალური ავტორები არ განიხილებიან.

ნანა ქვიშარელი