წელს გამოჩენილი ქართველი პოეტის და საზოგადო მოღვაწის, შოთა რუსთაველის სახელობის პრემიის ლაურეატის, ირაკლი აბაშიძის დაბადების 100 წლის იუბილეა. ქუთაისში ამ თარიღს ფოტოგამოფენით გამოეხმაურნენ. რომელიც დავით კაკაბაძის სახელობის სახვითი ხელოვნების გალერეაში 21 დეკემბერს გაიმართა.
ექსპოზიციაში ირაკლი აბაშიძის ცხოვრების ამსახველი ფოტოები იყო წარმოდგენილი. ეს ფოტოები ჯერ თბილისში გამოიფინა.
„ჩვენ ეს გამოფენა მოვხსენით და ქუთაისში წამოვიღეთ, თუმცა, ისიც გამაგონეს, რა დროს ირაკლი აბაშიძეაო, მაგრამ ყოველთვის, როცა გადაშლი და წაიკითხავ მის ლექსს „ხმა კატამონთან“, მიხვდები, რომ მისი დრო არასოდეს წავა,“ თქვა ქუთაისის მერიის კულტურის, განათლების, სპორტისა და ძეგლთა დაცვის სამსახურის უფროსმა გიზო თავაძემ.
ფოტოებზე კი ის ეპოქაა ასახული, რომელსაც ირაკლი აბაშიძე სხვებთან ერთად ქმნიდა: სიმონ ჩიქოვანი, გრიგოლ აბაშიძე, ჯონ სტაინბეკი, ჩინგიზ აიტმატოვი, რასულ გამზათოვი, ნიკოლოზ ტიხონოვი და სხვები.
გამოფენის გახსნის დღეს თბილისიდან ჩამოტანილი, სპეციალურად საიუბილეოდ გამოშვებული ბროშურები დაარიგეს.