განათლების რეფორმამ თან უამრავი სიახლე მოიტანა. ერთ-ერთი „მონაპოვარი“ მე-12 კლასია. უკვე მეორე წელია, სკოლის საკლასო ოთახებზე აბრა „მე-12 კლასი“ გაჩნდა. ეს სიახლე იმდენად არ მოსწონთ, რომ ხალხური ვერსიით, თორმეტწლიანი სწავლება მალე უნდა დასრულდეს. თუმცა, ეს მხოლოდ ხალხური ვერსიაა, ოფიციალურად კი მას არც კი განიხილავენ.
განათლებისა და მეცნიერების მინისტრმა ნიკა გვარამიამ „P.S.“-თან საუბრისას დაბეჯითებით განაცხადა, რომ 12-წლიანი სწავლების გაუქმებას არ აპირებს, რადგან თუ გვინდა^ რომ ევროპულ სტანდარტებს ვაკმაყოფილებდეთ, თორმეტწლიანი სწავლებაც უნდა ავიტანოთ. „ავიტანოთ“ კი სწორედ ის სიტყვაა, რაც ყველაზე კარგად წყვილდება მე-12 კლასთან.
ხელისუფლება თავის მხრივ მართალია, როცა ცდილობს, ქართული განათლება ევროპულთან შესადარისი გახადოს. ამისთვის, ბიუჯეტიდან დამატებით თანხებსაც ხარჯავს. თუმცა, ეს თანხა, ჯერჯერობით, მხოლოდ წყალში გადაყრილი ფულია, რადგან მეთორმეტეკლასელის ცხოვრება, სინამდვილეში^ აბიტურიენტის ცხოვრებაა. აბიტურიენტის დღის რეჟიმი კი რეპეტიტორებს შორის არის გაწერილი და სკოლისთვის ვეღარ იცლის.
ლანა წოწონავა: „სკოლაში თითქმის არ დავდივარ, მხოლოდ ხანდახან. სიმართლე გითხრათ, არ მესმის^ რატომ დაამატეს 12 კლასი. რა მასალას გადიან ჩემი თანაკლასელები, ისიც კი არ ვიცი. ცოტა ხნის წინ ჩემი კლასელი შემხვდა და მითხრა, მხოლოდ სამი-ოთხი ბავშვი დავდივართ სკოლაშიო. არ მცალია, ქართულში, ინგლისურში, მათემატიკასა და უნარებში ვემზადები, სკოლაში როდის უნდა ვიარო?“
ლუკა ობოლაძე: „სკოლაში უკვე ორი წელია^ თითქმის აღარ დავდივარ, მხოლოდ ორი დღე კვირაში. წელს ამასაც თუ შევძლებ, არ ვიცი. მასწავლებელმა გვითხრა, თუ ასე უნდა იაროთ, ერთმანეთში მაინც შეათანხმეთ, ვინ როდის მოხვალთ, დასწრება ცოტათი მაინც რომ ამოვწიოთო. რატომ დაამატეს ეს მეთორმეტე კლასი^ არ მესმის, თუმცა, ყველა დამამთავრებელ კლასში ასეთივე სიტუაცია იქნებოდა, 12 კლასი არაფერ შუაშია.“
დასწრების მხრივ პრობლემა რომ არსებობს, ამას არც სკოლის დირექტორები მალავენ. თუმცა, ამ პრობლემასთან გამკლავებას მეტნაკლებად მაინც ახერხებენ.
ქუთაისის 32-ე სკოლის დირექტორი ნათია ნამიჭეიშვილი ამბობს, რომ მათ სკოლაშიც ზუსტად ისეთივე სიტუაციაა, როგორც ყველგან.
„მეთორმეტეკლასელების სკოლაში სიარულს ზოგადი ფონი უშლის ხელს. ჩვენს სკოლაშიც არის იმის მცდელობა, რომ მეთორმეტეკლასელებმა სკოლაში არ იარონ, მაგრამ, სკოლის შინაგანაწესის დაცვით, მაინც ვახერხებთ და ვიბრძვით იმისთვის, რომ მეცადინეობებზე იარონ. გვესმის, რომ ისინი აბიტურიენტები არიან, ამიტომ დამატებით დავუშვით, რომ იმუშაონ საგამოცდო საგნებზე.“
მე-17 სკოლის დირექტორი ირინე ჯგერენაია, კი ამბობს, რომ მათ სკოლაში მეთორმეტეკლასელების დასწრების პრობლემა არ არსებობს.
„ნებისმირ დროს შეგიძლიათ მოხვიდეთ და ნახოთ, რომ დასწრებაა, რადგან ჩვენ ჩვენი მიდგომა გვაქვს. ყველა საგამოცდო საგანში ვამეცადინებთ ბავშვებს, საგამოცდო პროგრამას მივყვებით.“
სკოლის დირექტორები ამბობენ, რომ მე-12 კლასის სასწავლო პროგრამა ეროვნული გამოცდების პროგრამასთან შესაბამისობაში მოდის. პრაქტიკოსი პედაგოგები ამ შეხედულებას მაინც და მაინც არ იზიარებენ. თუმცა, ამაზე მხოლოდ პირად საუბრებში აღნიშნავენ.
„ქართულში, მაგალითად, სულ საზღვარგარეთის ლიტერატურაა ჩაყრილი. არა, ქართულის მასწავლებელს კი უნდა ჰქონდეს წაკითხული ეს ტექსტები, მაგრამ საზღვარგარეთის ლიტერატურა მაინც სხვა საგანია და სხვა სპეციფიკა სჭირდება. თან, სულ ისეთი მწერლის ნაწარმოებებია შესული, ეროვნული გამოცდების დროს, რომ არ სჭირდება ბავშვს და იმის წაკითხვისთვის მოგიცდება?“
ქართულის სახელმძღვანელო თავებადაა დაყოფილი. ერთ თემაზე რომ იმსჯელო^ რამდენიმე ნაწარმოები უნდა წაიკითხო: ზოგიც ქართული, ზოგიც უცხოური. ლოგიკური აზროვნების განსავითარებლად შესანიშნავადაა აწყობილი, მაგრამ, რადგანაც წიგნის ფასი საკმაოდ სოლიდურია _ 18-20 ლარი, ლოგიკური აზროვნებისთვის წიგნის არქონის, დროის არქონის^ ან^ სულაც^ ლოგიკური აზროვნების არქონის გამო აღარავინ იწუხებს თავს.
ასეა თითქმის ყველა საგანში.
არის თუ არა 12-წლიანი სწავლება საჭირო, ამაზე^ შეიძლება^ ძალიან ბევრი იმსჯელო. პედაგოგები თვლიან, რომ _ არა. ამ აზრს ბავშვებიც და მშობლებიც იზიარებენ. დირექტორები კი მაინც განათლების სისტემის მესვეურებთან დაახლოებულნი არიან და მიაჩნიათ, რომ თორმეტი კლასის არსებობა აუცილებელია. ამის მთავარ მიზეზად ნათია ნამიჭეიშვილი ევროპულ განათლებასთან მიახლოებას ასახელებს^ ირინე ჯგერენაია კი _ რამდენიმე მიზეზს:
ირინა ჯგერენაია: „მეთორმეტე კლასი რამდენიმე ფაქტორის გამოა კარგი. პირველი ის, რომ ფსიქოლოგიურად კიდევ უფრო გაწონასწორებულ და გააზრებულ არჩევანს გააკეთებს. მეთორმეტე წელს თავს ვუყრით იმ ცოდნას, რომელიც წლების განმავლობაში დავაგროვეთ, ვხდებით ევროპული განათლების ნაწილი და კიდევ, სკოლისთვისაც მნიშვნელოვანია, რადგან ყველა მასწავლებელს ეზრდება საათების რაოდენობა და შესაბამისად _ ხელფასიც. ამის გარდა, 12 კლასი _ ეს არის უფრო ფართო ასპარეზი პედაგოგისთვის, სადაც შეუძლია^ თავისი სრულყოფილი პოტენციალი გამოავლინოს.“
რა არის კარგი და რა _ ცუდი? ზოგადი სურათი ასეთია: მთავრობა ცდილობს განათლების სისტემით ევროპას მიბაძოს, საქართველოში კი თვით პედაგოგებიც კი სვამენ შეკითხვას: _ რად გვინდოდა ეს მე-12 კლასი?