საზოგადოებრივი მაუწყებლის გენერალურმა დირექტორმა გიორგი ჭანტურიამ პრესკონფერენციაზე განაცხადა, რომ პრემიერმინისტრობის კანდიდატებს შორის ტელედებატები 9 სექტემბერს გაიმართება. შესაბამისად, მაუწყებელი მზადაა, დებატების მეთოდოლოგია პარტიებს ხვალიდანვე გააცნოს.
საზოგადოებრივი მაუწყებელი პოლიტიკური სუბიექტებისგან პასუხს 5 სექტემბრის 18:00 საათამდე დაელოდება.
"წინასაარჩევნოდ მაუწყებელი არჩევნებში მონაწილე პარტიებს ტელედებატებისთვის ეთერს სთავაზობს. საარჩევნო კოდექსის 51-ე მუხლის მეორე, მესამე, მეოთხე და მერვე პუნქტების საფუძველზე, ტელედებატებში მონაწილეობის უფლება აქვთ: "ერთიან ნაციონალურ მოძრაობას", კოალიცია "ქართულ ოცნებას", "ქრისტიან-დემოკრატიულ მოძრაობას" და "ლეიბორისტულ პარტიას". დებატების პირველი ეთერი 9 სექტემბერსაა დაგეგმილი და მასში მონაწილეობის მისაღებად მაუწყებელი სწორედ ამ პარტიების მიერ დასახელებულ პრემიერ-მინისტრობის კანდიდატებს იწვევს. 18 სექტემბერს დაგეგმილ მეორე დებატზე კი მაუწყებელი ამავე პოლიტიკური პარტიების საარჩევნო სიების პირველ ნომრებს ეპატიჟება. დებატების წესები საარჩევნო სისტემების საერთაშორისო ფონდის ექსპერტის მიერ არის შემუშავებული", - განაცხადა ჭანტურიამ.