როგორც იქნა, არჩევნები დასრულდა. სწრაფად და დიდი მონდომებით გადანაწილდა თანამდებობებიც. ქუთაისი კი კვლავ პოლიტიკურ ეიფორიაშია საარჩევნო პლაკატების ნარჩენების გამო. სახლებისა და სხვადასხვა დაწესებულების კედლებზე, პრესტიჟულ თუ არაპრესტიჟულ ადგილებზე (მათ შორის - ნაგვის ურნებთან), ხეებსა თუ ელექტრობოძებზე შემოხვეულ-შემოხეული პლაკატებით დღესაც „თავს იწონებს“ ჩვენი ქალაქი.
ხშირი არჩევნებით თავმობეზრებული ხალხისთვის ეს „საარჩევნო სამკაული“ უკვე საკმაოდ შემაწუხებელ ატრიბუტად იქცა. „მოგვაცილეთ, მოხსენით, გაიტანეთ, დაგვავიწყეთ, დავიღალეთ, დაგვასვენეთ!“ - ამ რამდენიმე სიტყვაში იკვეთება ქუთაისელთა განწყობა.
„ქუთაისი არა მხოლოდ განვითარებული ინდუსტრიული ქალაქი და ადმინისტრაციული ცენტრი უნდა იყოს, არამედ უნიკალური ტურისტული ზონაც, რისთვისაც მისი პოტენციალის განვითარებაა აუცილებელი,“ - ეს სიტყვები პრეზიდენტმა სააკაშვილმა მაშინ წარმოსთქვა, როცა ყუმისთავის კარსტი „პრომეთეს მღვიმედ“ მონათლა. მისივე თქმით, ტურისტები ქუთაისში მალე არა მხოლოდ ბაგრატის, გელათის, ქუთაისის ცენტრის, არამედ მსოფლიო მასშტაბის უნიკალური მღვიმეების დასათვალიერებლად ჩამოვლენ.
კიდევ კარგი, ეს „მალე“ დღეს რომ არაა, თორემ „ნაარჩევნებარი“ ქალაქი ტურისტული მიმზიდველობისგან ძალიან შორსაა და პრეზიდენტის რეკლამაც ანტირეკლამას უფრო ჰგავს.
ქუთაისის ქუჩებში ნაფლეთ-ნაკუწებად შემორჩენილი, არჩევნებში მონაწილე კანდიდატთა სარეკლამო ფოტოსურათები, ალბათ, კარგა ხანს შეგვახსენებს 30 მაისის თვითმმართველობის არჩევნებს და არა მხოლოდ მას. კურიოზებით ცნობილ ქუთაისში არაერთგან წააწყდებით საარჩევნო კურიოზებსაც: ქალაქის ცენტრში, ფალიაშვილის ქუჩაზე, ცენტრალური ბაზრის მიმდებარე ტერიტორიაზე, თვალშისაცემ ადგილზე, ჯერ კიდევ საპარლამენტო არჩევნების დროიდან შემორჩენილი გუბაზ სანიკიძე გვიღიმის აწ უკვე გახუნებული საარჩევნო პლაკატებიდან. მის ქვემოთ კი ჯერაც „გაუხუნარი“ პლაკატები გვჭრის თვალს.
ქუთაისის კეთილმოწყობის სამსახურის უფროსის, გიორგი წულაძის განცხადებით, მათ სამსახურს სარეკლამო-საარჩევნო ფოტოსურათების ნარჩენებისგან ქალაქის გასუფთავება არ ევალება.
„კანონით, ვინც გააკრა, მანვე უნდა ჩამოხსნას. პოლიტიკურ პარტიებს ამისთვის თანხაც ერიცხებათ,“ - ამბობს გიორგი წულაძე. მისივე თქმით, ის, ვინც დაკისრებულ მოვალეობას არ შეასრულებს, დაჯარიმდება, თუმცა რა ოდენობით განისაზღვრება ეს ჯარიმა, მას არ დაუკონკრეტებია.
საოლქო-საარჩევნო კომისიის თავმჯდომარემ ავთანდილ ოსეფაიშვილმაც დაადასტურა კეთილმოწყობის სამსახურის უფროსის ნათქვამი. „რატომ არ ასრულებენ პოლიტიკური პარტიები ამ ვალდებულებას, მათ ჰკითხეთ,“ - გვითხრა ბატონმა ოსეფაიშვილმა. გავითვალისწინეთ მისი რჩევა და შევეცადეთ, პოლიტიკური პარტიების წარმომადგენლებთან გაგვერკვია ეს საკითხი.
კონსერვატორებთან დაკავშირება იმ მიზეზით ვერ მოხერხდა, რომ „მძიმე საარჩევნო ბატალიების“ შემდეგ ოფისი გამოკეტილია. ალბათ, ისვენებენ.
ნაციონალების პარტიის ოფისში კი თავი მოიწონეს იმით, რომ წინა არჩევნების პლაკატებისგან ქალაქი პირწმინდად გაასუფთავეს, ხოლო ახლა გამარჯვებით ტკბებიან და ჯერჯერობით ვერ მოიცალეს.
თუ პოზიცია-ოპოზიცია ასე მშვიდად განაგრძობს „თვალების ნაბვას“, ქუთაისის ქუჩებში ეს სარეკლამო პლაკატები 2013 წლის საპრეზიდენტო არჩევნებს ნამდვილად ხელუხლებელი დახვდება.
„ომამდე ტანკისტობა“ სულაც არ არის საჭირო, რომ „გრელანდიის“ თავში დაცემის პერსპექტივას წინასწარ ვჭვრეტდეთ და ვყვიროდეთ: „გაიტანეთ გრელანდია!“ თავში არა, მაგრამ გულზე ნამდვილად ეკალივით გვჩხვლეტს უკვე გაზეპირებული გზავნილები და...
„გაიტანეთ, ბატონებო, გაიტანეთ!“