რა საერთო აქვთ აკაკის ძეგლს და როკ-ჯგუფებს?
მოქმედების ადგილი: ქალაქის ცენტრალური ბულვარი, სადაც სულ სამი თუ ოთხი ძეგლია და მუდამ უამრავი ადამიანი.
სტატიის მთავარი გმირი: აკაკი წერეთლის ძეგლი, რომელიც ბულვარში დგას და ძეგლებს შორის ყველაზე დიდი პოპულარობით სარგებლობს. განსაკუთრებით - ახალგაზრდებში და, მეტადრე, როგორც ჩანს, როკერებში. რადგან ძეგლზე ათამდე როკ-ჯგუფის სახელწოდების წარწერაა და ეს წარწერები დღითიდღე იმატებს.
მთავარი კითხვა: რა საერთო აქვთ აკაკის ძეგლსა და ამ როკ-ჯგუფებს ერთმანეთთან? (რა თქმა უნდა, ეს მწარე ხუმრობით, თუმცა, მაინც გამიზნული კითხვაა.)
სტატიის რესპონდენტები: სხვადასხვა თაობის ქუთაისელები.
ქუთაისელი 1, რომელიც შეიძლება ერთ-ერთი წარწერის ავტორიც იყოს, იქნება, ასე 18-20 წლის: „უი, წარწერები აქვს? ბიჭები აქ ვაბირჟავებთ, მე არც კი შემინიშნავს. ვაა, რა ცუდია! ვისი ძეგლია? აკაკისი? ხელები არ უნდა მოამტვრიო ახლა, ვინც ამას აკეთებს? (სხვათაშორის, თუ იმ ემოციას მოვაშორებთ, რითაც ამ კომენტარს აკეთებდა, იფიქრებ, ამ ახალგაზრდა ბიჭმა გულთან როგორ მიიტანა აკაკის ძეგლის ამბავიო. თუ ემოციას არ მოაცილებ, ძალიან რბილად რომ ვთქვათ, აკაკის ძეგლზე წარწერები სასაცილოდაც არ ყოფნის (ამ აბზაცის წაკითხვისას ბევრი, ალბათ, გაიფიქრებს, ბევრიც იტყვის - რა თაობა მოდისო!)
ქუთაისელი 2: „არ ვიცი, დეიდა, ვინ გააკეთა ეს წარწერები. პირველად დავჯექი დღეს აქ და რაღა მაინცდამაინც მე მომადექით. ინგლისური საერთოდ არ ვიცი და ისიც არ ვიცი, რაები წერია.“
ბულვარში უამრავი ქუთაისელია, საბედნიეროდ, ყველა ერთნაირად არ ფიქრობს. ფაქტს აფასებენ, როგორც ვანდალიზმს (!). თუმცა, ვერ იხსენებენ, რომ ოდესმე წარწერათა ავტორი გაეკიცხათ, ან მიეთითებინათ.
„არ დაგვინახავს, გენაცვალე, თორემ საყვედურს როგორ არ ვეტყოდიო?“
ძეგლი პირდაპირ მერიას გასცქერის, მერიას სხვა სამსახურებთან ერთად აქვს კულტურის, სპორტის, განათლებისა და ძეგლთა დაცვის სამსახურიც, რომლის უფროსი, პოეტი გიზო თავაძე ამბობს: „ეს ჩვენი პირდაპირი მოვალეობა არ არის.“
„თუმცა, რამდენჯერ წავაშლევინეთ, როცა ინფრასტრუქტურის სამსახურის უფროსი გოგი ბალანჩივაძე იყო, რამდენჯერმე პირადად ვთხოვე. რად უნდა ამას „მევალება, არ მევალება!“ რომ დავინახო, ვინმე აკეთებს, უნდა მივუთითო. თუ შევხედავ რომ ასეა, რად მინდა ვალდებულება, ისედაც კი ვეტყვი შესაბამის სამსახურებს, წარწერები წაშალონ. თან მომავალი წელი აკაკის წლადაა გამოცხადებული.“ დასძენს იგი.
ასეა, თუ ისე, მერიაში ხელებს იბანენ. ბევრჯერ წაუშლიათ ეს წარწერები, მაგრამ როკ-ჯგუფებს ისეთი ფანები ჰყავს, იმათთან რას გახდები?!
წარწერებიანი აკაკის ძეგლი უკვე რამდენიმე ხანია, ქალაქის ინტელიგენციის ერთ-ერთი სატკივარია.
თეიმურაზ ლანჩავა, მწერალთა კავშირის იმერეთის ორგანიზაციის თავმჯდომარე: ის აჭყაპნის, ვისაც აკაკი არ უყვარს, არ იცის, ვინ არის და წარსულს პატივს არ სცემს. მარტო ქალაქის ხელმძღვანელობა არ არის ბრალში, მაგრამ ვისაც ხელეწიფება, ყველამ უნდა უზრუნველყოს ამ პრობლემის მოგვარება. წარსულს პატივი უნდა ვცეთ და უნდა მოვუაროთ. ბერძენიშვილის ძეგლზე ვიძახეთ, ნადგურდება, მივხედოთო და საბოლოო ჯამში, რა გამოვიდა? ავაფეთქეთ და რა შედეგიც მოჰყვა, თქვენც კარგად ხედავთ. ყველამ უნდა მივხედოთ, რადგან ეს ჩვენი ქალაქია.
ლალი ნიშნიანიძე, კულტურის პროფკავშირების თავმჯდომარე: „საშინელებაა, საშინელება! საუბედუროდ, აღზრდის ბრალია ყველაფერი, არ არიან ახალგაზრდები დამნაშავე, როგორც გაზარდეს, იმას აკეთებენ. ჩვენი საზოგადოების ბრალია.“
ერთი სიტყვით, გამოიკვეთა, რომ ბრალი ჩვენშია - საზოგადოებაში!
ამას ისიც ემატება, რომ ხელისუფლება ვერ ახერხებს, მუდამ ჩვრით ხელში წმინდოს ჩვენი როკ-ჯგუფების გრაფიკული „ხელოვნებით“ გამოწვეული ემოციები, ისიც - აკაკის ძეგლზე.
აკაკის ძეგლი კი დგას და, „თავის მარადიულ ბედს გასცქერის.“