2013 წლის მაისში საქართველოში საბანკო არხებით შემოსული ფულადი გზავნილების ნაკადების მოცულობამ 114.7 მლნ აშშ დოლარი, ანუ 188.4 მლნ ლარი შეადგინა.
ეროვნული ბანკის ინფორმაციით, აღნიშნული მაჩვენებელი 1.9 მლნ აშშ დოლარით (3.2 მლნ ლარით), ანუ 1.7 პროცენტით ნაკლებია 2012 წლის მაისის ანალოგიურ მაჩვენებელზე.
უცხოეთიდან საქართველოში ფულადი გზავნილების 93.6 პროცენტი იმ 12 უმსხვილეს დონორ ქვეყანაზე მოდის, საიდანაც ასეთი გზავნილების მოცულობამ მაისში 1 მლნ აშშ დოლარს გადააჭარბა.
იმავე 12 ქვეყანაზე გასული წლის მაისში მთელი ფულადი გზავნილების 94.6 პროცენტი მოდიოდა.
ამავე წყაროს ცნობით, 2013 წლის მაისში საქართველოდან საზღვარგარეთ 12.2 მლნ აშშ დოლარი (20.0 მლნ ლარი) გადაიგზავნა. ეს მონაცემი გასული წლის მაისში 9.0 მლნ აშშ დოლარს (14.6 მლნ ლარი) უდრიდა.