"განვითარებისა და დემოკრატიის ცენტრის" (CDD) შეფასებით, 2014 წლის თვითმმართველობის არჩევნების განმეორებით კენჭისყრის პროცესი მშვიდ და ორგანიზებულ გარემოში წარიმართა .
CDD-ის სადამკვირვებლო მისიის ხელმძღვანელის ქეთევან ჩაჩავას განცხადებით, დაფიქსირდა პროცედურული ხასიათის დარღვევები, თუმცა ზემოთ აღნიშნული ხარვეზები ადმინისტრაციის მხრიდან მყისიერად გამოსწორდა. საბოლოო ჯამში, განვითარებისა და დემოკრატიის ცენტრის სადამკვირვებლო მისიის წევრების მიერ კენჭისყრის პროცესი დადებითად შეფასდა.
ცენტრის დამკვირვებლები, ასევე, დააკვირდებიან ხმის დათვლისა და შედეგების შეჯამების პროცესს. არჩევნების განმეორებითი კენჭისყრა დღეს საქართველოს მასშტაბით ცხრა საარჩევნო ოლქში (#22 მარნეული, #26 თეთრიწყარო, #28 დუშეთი, #40 ახალქალაქი, #55 ხონი, #57 ტყიბული, #67 ზუგდიდი, #79 ბათუმი, #81 ქობულეთი) გაიმართა.


წყარო: interpressnews.ge