საქართველოს თავდაცვის მინისტრი ირაკლი ალასანია ევროკავშირთან ასოცირების ხელშეკრულების ხელმოწერას ისტორიულს უწოდებს და აღნიშნავს,
რომ კიდევ ერთი მნიშვნელოვანი ეტაპი საქართველოსთვის სექტემბერში ნატო-ს სამიტის დროს დაიწყება.
თავდაცვის მინისტრი საქართველოს მოსახლეობას ულოცავს ხელშეკრულების გაფორმებას და აცხადებს, რომ აღნიშნული გადაწყვეტილებით შეუქცევადი ხდება საქართველოს კურსი ევროპული ოჯახისკენ.
"მართლაც ისტორიულ, საეტაპო გადაწყვეტილებას აწერს ხელს საქართველო ევროკავშირთან. რაც მნიშვნელოვანია, აწერს ხელს იმ ვითარებაში, როცა საქართველო სტაბილურად, თანმიმდევრულად აგრძელებს თავის საგარეო პოლიტიკურ კურსს, აღებულს ევროპისა და ევროატლანტიკური სივრცისკენ. იცით, რომ სექტემბერში კიდევ ერთი მნიშვნელოვანი ეტაპი დადგება ჩვენი ქვეყნის ისტორიაში, როდესაც ნატო-ს სამიტი ჩატარდება და ახალი ეტაპი დაიწყება საქართველოსა და ნატო-ს შორის", - აღნიშნა ირაკლი ალასანიამ.
საქართველო-ევროკავშირის ასოცირების შეთანხმების ხელმოწერა ბრიუსელში ხვალ გაფორმდება.
წყარო:
interpressnews.ge