ევროპულ და ევროტალანტიკურ სტრუქტურებში ინტეგრაციის საკითხებში სახელმწიფო მინისტრის, ალექსი პეტრიაშვილის განცხადებით , "ნეტარ არიან ისინი", ვისაც სჯერა, რომ "ნაციონალური მოძრაობის" წევრების პროკურატურაში დაბარება და ვანო მერაბიშვილის პატიმრობა ევროკავშირს საქართველოზე უარს თავად ათქმევინებს. ამის შესახებ ალექსი პეტრიაშვილმა ჟურნალისტებს განუცხადა.
ამით სახელმწიფო მინისტრი დედაქალაქის მერის, გიგი უგულავას განცხადებას გამოეხმაურა, რომლის მიხედვითაც, დღეს რაც ხდება, მივა იქამდე, რომ უკრაინისგან განსხვავებით, ევროპა თავად იტყვის უარს საქართველოზე.
"ვისაც ამის სურვილი აქვს, დაიჯეროს, რომ ეს დაბარებები, ეს პროცესები ევროკავშირს უარს ათქმევინებს, ნეტარ არიან", - განაცხადა პეტრიაშვილმა.
მისივე თქმით, ახლახან დაბრუნდა პოლონეთიდან და ბრიუსელიდან, სადაც "გამალებული ტემპით მიდის მუშაობა" საქართველოსა და ევროკავშირს შორის ასოცირების შეთანხმების ხელმოწერის მომზადებაზე.
"დაზუსტებით შემიძლია გითხრათ, რომ ხელმოწერა მოხდება მომავალი წლის სექტემბერში", - განაცხადა ალექსი პეტრიაშვილმა.


წყარო: interpressnews.ge