საქართველოს შრომის, ჯანმრთელობისა და სოციალური დაცვის მინისტრი დავით სერგეენკო აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელ ვახტანგ ყოლბაიასა და აფხაზეთის მთავრობის წევრებს შეხვდა.
შეხვედრა გაცნობით ხასიათს ატარებდა და ის კითხვა-პასუხის რეჟიმში წარიმართა. აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელმა ვახტანგ ყოლბაიამ დავით სერგეენკოს აფხაზეთის მთავრობის ახალი შემადგენლობა გააცნო.
შეხვედრაზე დევნილთა მიმართულებით ჯანდაცვის სფეროში მიმდინარე პროგრამებზე და აფხაზეთში მცხოვრები მოსახლეობისთვის გადაუდებელი სამედიცინო მომსახურების სერვისებზე იმსჯელეს.
საუბარი ასევე შეეხო საყოველთაო დაზღვევის პროგრამებს, პენსიების ზრდასა და გადაუდებელი სამედიცინო სერვისებისთვის გაზრდილი რეფერალური პროგრამის საკითხებს.
აღინიშნა, რომ გალის რაიონის სამედიცინო ცენტრს დამატებითი რეანიმობილები და შესაბამისი სამედიცინო აღჭურვილობა გადაეცა.

წყარო: interpressnews.ge