საპრეზიდენტო არჩევნებმა დაადასტურა, რომ მთავარი ოპოზიციური ძალა "ერთიანი ნაციონალური მოძრაობაა", - ასე ეხმაურება პარტიის ერთ-ერთი ლიდერი, დეპუტატი გიორგი ვაშაძე ეგზიტპოლების შედეგებს.
როგორც მან ჟურნალისტებს განუცხადა, ახლა, როცა ხმის დათვლის პროცესი მიმდინარეობს, მათი წარმომადგენლები უბნებზე თითოეულ ხმას დაიცავენ.
ვაშაძეს ეგზიტპოლის შედეგები იმის თქმის საფუძველსაც აძლევს, რომ პარტიის რეიტინგი მზარდია. "სულ რამდენიმე თვის წინ გაცილებით დაბალი რეიტინგი გვქონდა. ეს შედეგები ადასტურებს, რომ პარტიის რეიტინგი მაღლა და მაღლა მიდის. მომავალ წელს საქართველოში ადგილობრივი თვითმმართველობის არჩევნები ტარდება - ჩვენ ამ არჩევნებზე გაცილებით უფრო სერიოზულ შედეგს ვაჩვენებთ", – აღნიშნა გიორგი ვაშაძემ.

წყარო: interpressnews.ge