სულ რამდენიმე დღე და 2009 წელიც მიილევა. კიდევ ერთი წლის ფაქტები აიკინძება ისტორიად. თუ განვლილ დღეებს ემოციის გარეშე, ცივი გონებით შეაფასებ, დასკვნის გაკეთებაც შეიძლება - უღიმღამო წელი იყო. თუმცა, თითოეული ფაქტი კონკრეტულ ადამიანებთან არის დაკავშირებული. შესაბამისად, ზოგისთვის ამ წელს შეიძლება „სასწაულები“ მოხდა, ზოგისთვისაც - ცა ჩამოიქცა.
როგორი იყო ეს წელი ქუთაისისთვის?
ციალა, 62 წლის: „განსაკუთრებული არაფერი ყოფილა. ფინანსურად არ გაუმჯობესებულა ჩემი მდგომარეობა, ხელფასიდან ხელფასამდე თავი ძლივს გაგვაქვს. მადლობა ღმერთს, ოჯახში ჯანმრთელობის პროლემა არ შეგვქმნია. რაც შეეხება ქალაქს, ბოლომდე მიყვანილი საქმე, ჯერჯერობით, მე არ მინახავს.“
ეს ერთი ჩვეულებრივი რიგითი ქუთაისელის შეფასებაა. 2009 წელს სხვადასხვა დარგის სპეციალისტები ასე აფასებენ:
პაატა კლდიაშვილი, საქართველოს ეკონომისტთა ასოციაციის იმერეთის წარმომადგენლობის დირექტორი: „2009 წელს გასული წლიდან „საჩუქარი“ დახვდა - კრიზისი და აგვისტოს მოვლენები. ეს ზეგავლენა დღესაც იგრძნობა, თუმცა, მისი შემცირების ტენდენციები გამოჩნდა. ეკონომიკა ნელი ტემპით იწყებს გამოსვლას, ანუ ეს წელი პოსტკრიზისული პერიოდია. კრიზისი კი დონორთა 4, 5 მილიარდიანმა დახმარებამ გადაგვატანინა. ქუთაისში არც ინდუსტრიული ზონის შედეგი დაგვინახავს და არც მეორე დედაქალაქობის.“
ნოდარ ჯიქია, ახალგაზრდა იურისტთა ასოციაციის ქუთაისის ფილიალის პროგრამების დირექტორი: „რა გითხრათ? რით გაგახაროთ?“ 2009 წელმა სურვილები არ გაგვიმართლა, საკონსტიტუციო კომისიიდან აშკარად ველოდით თვითმმართველობის ფინანსური გაძლიერების აქტს. პარლამენტის გადმოტანის იდეაც ნაჩქარევი არის და ამას პარლამენტარიზმის იდეის დისკრედიტაციად ვთვლი. ისე, როგორც კონტროლის პალატის გადმოტანას - მხარჯავი დაწესებულებების 90% თბილისშია, არც დაპირებები შესრულებულა, რომ ინდუსტრიულ ზონებში ათასობით ადამიანი დასაქმდებოდა. არც გამოშვებული ტექნიკა გვინახავს სადმე და კიდევ წელს ყველას სურვილი იყო, პენსია გაზრდილიყო, თუმცა, მხოლოდ თბილისელებს გაეზარდათ, ეს კი ადგილობრივი ხელისუფლების ფუნქციებს სცდება და ცენტრალური ხელისუფლების ფუნქციებში იჭრება.“
ფაქტები 2009 წლიდან:
2009 წლის დასაწყისში პირველი მნიშვნელოვანი ინიციატივა ბაგრატის ტაძრის აღდგენა იყო, იგი ამ წელს რამდენჯერმე აღმოჩნდა მედიის ყურადღების ობიექტი. ხარაჩოებში ჩასმულ ბაგრატზე არქეოლოგებმა ძვირფასი სამარხი აღმოაჩინეს, რამაც ბაგრატის ტაძრის ქვეშ დამარხული საიდუმლოებების ნაწილი გააცხადა.
ცოტა მოგვიანებით ბაგრატის ტაძრის აღდგენის ირგვლივ დაიწყო მწვავე დისკუსია. გაჩნდა ეჭვი, რომ ბაგრატის აღდგენა არასწორი ფორმით და მასალით ხდებოდა.
ტრაგიკული ფურცლები:
როცა განვლილ დღეებს გადავხედეთ, აღმოჩნდა, რომ მწუხარებით სავსე დღეები საკმაოდ ბევრი იყო. მასწავლებელთა სახლში გაჩენილ ხანძარს პედაგოგი შეეწირა.
განსაკუთრებით გამაოგნებელი ჩვენი ქალაქისთვის, ზაფხულზე ტელეკომპანია „რიონის“ ოთხი ჟურნალისტის ტრაგიკული დაღუპვა გახლდათ.
არანაკლებ მტკივნეული კი ცოტა ხნის წინ, „დიდების მემორიალის“ აფეთქებისას დედა-შვილ ჯინჭარაძეების ტრაგიკული დაღუპვა.
მთავრობის ინიციატივები:
ჯერჯერობით, მხოლოდ და მხოლოდ ინიციატივებია, რომელიც ცენტრალურმა ხელისუფლებამ ქუთაისისთვის არ დაიშურა. ქუთაისის გამეორედედაქალაქება, პარლამენტის ნაწილობრივი გადმოტანა, თავისუფალი ეკონომიკური ზონის გახსნა და კიდევ - ძველი უბნის რეაბილიტაციის მეორე ეტაპის დასაწყისი. არადა, რეალურად არც არაფერი დაწყებულა, ან თუ დაიწყო, მხოლოდ და მხოლოდ ინიციატივის დონეზე.
წლის საკადრო ცვლილებები:
ეს კომპონენტი ყოველ წელს განახლებადია. ნუგზარ შამუგიამ ქუთაისის მერებს შორის, მართალია, რეკორდი მოხსნა და თანამდებობაზე ყველაზე დიდხანს - ორი წელი და ორი თვე გასტანა, მაგრამ 2009 წლის მიწურულს, პრეზიდენტის „დახმარებით“, წასვლის შესახებ განცხადება დაწერა და წავიდა.
სააკაშვილის გადაწყვეტილებით, თანამდებობა პრეზიდენტის რწმუნებულმა იმერეთის მხარეში - მიხეილ ჩოგოვაძემაც დატოვა. ახალ წელს ახალი მერით კი შევხვდებით - საკრებულომ გია თევდორაძე უკვე დაამტკიცა, მაგრამ უგუბერნატორობა, მგონი, მოგვიწევს.
2009 წელს ქუთაისში კიდევ ბევრი რამ მოხდა - პრემიერები დაიდგა თეატრებში, პირველი ვარსკვლავი გავხსენით მესხიშვილის თეატრის წინ. მაგრამ განსაკუთრებულად სასიამოვნო და მნიშვნელოვანი ფაქტის გახსენება, რომელიც ამ ქალაქში მოხდა, გვიჭირს. იმედია, 2010 წლის მიწურულს ასე არ იქნება.
ნინო ჯანელიძე
მაკა ჩინიჯიშვილი