ჰოლანდიაში მიგრაციის საერთაშორისო ორგანიზაციის ერთ-ერთი, სამწლიანი პროექტი ლეგალურად მცხოვრებ ქართველებს საშუალებას აძლევს, სამშობლოში დაბრუნდნენ და თავიანთი გამოცდილება სხვებს გაუზიარონ. ამ პროექტის ფარგლებში მარეხ ტოგონიძე მესამე ადამიანია, ვინც უკვე ორ კვირაზე მეტია, საქართველოშია და მიკრო საფინანსო ორგანიზაცია „კრისტალის“ თანამშრომლებს თავის გამოცდილებას უზიარებს.
მანამ, პროექტის ფარგლებში, ჩამოსული იყო ორი ადამიანი, რომელთაგან ერთი მუზეუმთან თანამშრომლობდა, მეორე „კვირის პალიტრასთან“.
„გამოცდილების გაზიარებაც საინტერესო პროცესი გამოვიდა, მუზეუმში მივლინებულმა გოჩა ლაღიძემ, რომელიც გამოცდილი რესტავრატორია, ერეკლეს ხმალი აღადგინა, რომელიც ძალიან იყო დაზიანებული და ხელის მიკარებას ვერავინ ბედავდა. გოჩამ თვითონ ჩამოიტანა მასალები და იმ ბაზარის შესახებაც მიაწოდა ინფორმაცია, კოლეგებს, სადაც ამ მასალების შეძენა შეიძლება.
რაც შეეხება „კვირის პალიტრას“, მათთან არტ-დიზაინერი მამუკა ქობულაძე იმყოფებოდა, მუშაობის პროცესი იმდენად საინტერესო იყო, რომ „კვირის პალიტრას“ კვლავ სურს მათთან კონსულტაციები და, სავარაუდოდ, მამუკა გაზაფხულზე ისევ ჩამოვა“, - განაცხადა მიგრაციის საერთაშორისო ორგანიზაციის საზოგადოებასთან ურთიერთობების სპეციალისტმა ხათუნა ლოსაბერიძემ.
მარეხ ტოგონიძე ჰოლანდიის ერთ-ერთ მსხვილ ბანკში, კრედიტების მენეჯერად მუშაობს. ამბობს, რომ აქ გამოცდილებას სხვებსაც უზიარებს და თვითონაც უამრავ რამეს სწავლობს.
„მე ვმუშაობ ორგანიზაციაში, სადაც ყველა სისტემა აწყობილია. იქ რისკის მომენტი მაქსიმალურად შეზღუდულია, აქ კი ისეთ რისკზე მიდის ორგანიზაცია, რაზეც ჰოლანდიაში არავითარ შემთხვევაში არავინ წავა.“
ქალბატონი მარეხი ჰოლანდიაში ქართული სათვისტომოს ხელმძღვანელიცაა. ზუსტი სტატისტიკა არ არსებობს, თუმცა, ჰოლანდიაში სულ 2000-მდე ლეგალურად მცხოვრები ქართველია, არალეგალებიც არიან, მათ მიმართ კანონი მაშინ არის ძალიან მკაცრი, თუ რამეს აშავებენ.
პროექტს ჰოლანდიის მთავრობა აფინანსებს. ანალოგიური პროექტები აქამდე სლოვაკეთში, ავღანეთსა და სომალში განხორციელდა.