ანტიკრიზისული საბჭოს თავმჯდომარე გია თორთლაძე ქუთაისის მერს და საკრებულოს თავმჯდომარეს შეხვდა. როგორც თორთლაძემ განაცხადა, მსგავსი ტიპის შეხვედრებს ანტიკრიზისული საბჭო ხშირად მართავს ადგილობრივი თვითმმართველობის სხვადასხვა წარმომადგენელთან ამა თუ იმ ტერიტორიულ სუბიექტში არსებული პრობლემური საკითხების გაცნობისა და მათი გადაჭრისათვის აუცილებელი ღონისძიების შემუშავების მიზნით. ანტიკრიზისული საბჭოს თავმჯდომარემ ქუთაისის თვითმმართველობის ხელმძღვანელებთან ქალაქის წყლით, გარე განათებით, გზებით უზრუნველყოფის პრობლემებზე ისაუბრა. ქუთაისის საკრებულოს თავმჯდომარემ, ამირან ხვადაგიანმა აღნიშნა, რომ გია თორთლაძეს ქალაქის პრობლემების გადაჭრასთან დაკავშირებით „სწორი ხედვა“ აქვს. თავის მხრივ ასეთი შეხვედრების პოზიტიურობაზე მიანიშნა გია თორთლაძემაც, რომელმაც განაცხადა, რომ ხელისუფლებისა და ოპოზიციის წარმომადგენლების მსგავსი ტიპის შეხვედრები აუცილებელია. მას მიაჩნია, რომ ქვეყანის წინსვლა დაპირისპირებული მხარეების კონსტრუქციული ურთიერთობით, ადამიანების პრობლემებზე ერთობლივი კონცენტრირებითაა შესაძლებელი.