სახალხო დამცველი მწუხარებას გამოთქვამს 13 აგვისტოს ჭიათურის „ითხვისის“ მაღაროში მომხდარი უბედური შემთხვევისას დაღუპული ორი მაღაროელის - როლანდ ნოზაძისა და იუზა სამხარაძის გამო და უსამძიმრებს მათ ოჯახებს და სპეციალურ განცხადებას ავრცელებს საქართველოს მთავრობის მიმართ.
* * *
სამუშაო ადგილებზე შრომის უსაფრთხოების შემაშფოთებელი მდგომარეობის გამო სახალხო დამცველმა საქართველოს მთავრობას რეკომენდაციით ჯერ კიდევ 2013 წლის 2 ივლისს მიმართა.
2007 წლიდან მოყოლებული, კატასტროფულად მატულობს გარდაცვალებისა და დაზიანების ფაქტები. განსაკუთრებით შემაშფოთებელია 2010-2011 წლის სტატისტიკა, როდესაც საწარმოო უბედურმა შემთხვევებმა პიკს მიაღწია.
საქართველოს შინაგან საქმეთა სამინისტროს ინფორმაციით 2010 წელს სამუშაო შესრულებისას დაშავებულთა რაოდენობა იყო 102, გარდაცვლილთა რაოდენობა - 42. 2011 წელს დაშავებულთა რაოდენობაა 137, გარდაცვლილთა რაოდენობა - 54. 2012 წლის მონაცემები დამუშავების პროცესშია.
სამწუხაროდ, ეს შემაშფოთებელი ტენდენცია დღემდე გრძელდება. ამა წლის 15 ივლისს ჭიათურის „შუქრუთის“ მაღაროში აფეთქების შედეგად გარდაიცვალა ერთი ადამიანი. ასევე, დაფიქსირდა 15-მდე საშუალო და მძიმე კატეგორიის ტრავმული შემთხვევა.
აღნიშნული მდგომარეობის გამო საქართველოს სახალხო დამცველმა 2013 წლის 2 ივლისის რეკომენდაციით მიმართა საქართველოს მთავრობას და მოითხოვა:
როგორც საქართველოს მთავრობის კანცელარია იუწყება, საქართველოს სახალხო დამცველის რეკომენდაცია გადაეგზავნა საქართველოს ეკონომიკისა და მდგრადი განვითარების, საქართველოს შრომის, ჯანმრთელობისა და სოციალური დაცვის და საქართველოს იუსტიციის მინისტრებს. ასევე, საგადასახადო ომბუდსმენს.
2013 წლის 13 აგვისტოს ჭიათურის „ითხვისის“ მაღაროში ადამიანთა დაღუპვის სამწუხარო ფაქტი კიდევ ერთხელ მოწმობს, რომ შრომის უსაფრთხოების უზრუნველყოფის მიზნით საქართველოს მთავრობამ დროულად უნდა გადადგას კონკრეტული, ქმედითი ნაბიჯები.
საქართველოს სახალხო დამცველი კვლავ მოუწოდებს საქართველოს მთავრობას, მაქსიმალურად სწრაფად დაიგეგმოს კონკრეტული ღონისძიებები სამუშაო ადგილებზე შრომის უსაფრთხოების უზრუნველყოფის მიზნით.