პრეზიდენტმა „სისხლის სამართლის საპროცესო კოდექსში“  შესატანი ცვლილებების კანონპროექტს ვეტო დაადო. აღნიშნულ გადაწყვეტილებას მხარს უჭერს ადვოკატთა კორპუსიც. ისინი საკუთარი და საზოგადოების უფლებების დასაცავად უპრეცედენტო აქციათა ციკლს დაიწყებენ. „ადვოკატები  ასეთი ერთსულოვნები ჯერ არ ვყოფილვართ, ჩვენ ერთად დავდექით ჩვენი უფლებების დასაცავად. როგორ შეიძლება ადვოკატს შუამდგომლობის დაყენება აუკრძალო სასამართლოს წინაშე. ეს არის ფეოდალიზმი, ეს არის ბოლშევიზმი და ამ ეპოქაში დაბრუნება აღარ გვინდა. ადვოკატებს უნდა გვქონდეს ინფორმაციის გამოთხოვის უფლება, ისევე, როგორც პროკურორებს“. - განაცხადა ადვოკატთა ასოციაციის თავმჯდომარემ ზაზა ხატიაშვილმა

აღნიშნული კანონპროექტის თანახმად, ადვოკატს აღარ ექნება უფლება სასამართლოს მიმართოს ჩხრეკისა და ამოღების თაობაზე, ასევე, პაროლამენტმა დამატებად შეიტანა 120-ე მუხლში მეათე პუნქტი. ამ პუნქტის მიხედვით, ადვოკატის მტკიცებულება პროკურორმა უნდა გადაამოწმოს.

საპარლამენტო უმრავლესობის წევრის ზაქარია ქუცნაშვილის თქმით, მათ ორკვირიანი ვადა აქვთ იმისათვის, რომ გაითვალისწინონ ადვოკატების პროტესტი „სისხლის სამართლის საპროცესო კოდექსში“ შეტანილ ცვლილებებთან დაკავშირებით.

„მინდა ჩემი ღრმა პატივისცემა გამოვხატო იმ ადვოკატების მისამართით, რომლებიც რამდენიმე დღეა აპროტესტებენ მიღებულ კანონპროექტს. ჩვენ აუციებლად განვიხილავთ ადვოკატების შენიშვნას და მოხდება მასზე რეაგირება“. - ამბობს საპარლამენტო უმრავლესობის წევრი, ზაქარია ქუცნაშვილი.

უმრავლესობის კიდევ ერთი წევრის, გედევან ფოფხაძის თქმით კი, როცა კომიტეტში ვეტოს განხილვა დაიწყება ზაზა ხატიაშვილსაც მოუსმენენ."პრეზიდენტის ვეტო ჯერ უნდა განიხილონ კომიტეტებმა და შესაბამისად, კომიტეტების დონეზე შეიძლება პოზიციების შეჯერება. ალბათ, თვითონ ზაზა ატიაშვილიც მოვა კომიტეტზე, თავის პოზიციას ჩამოაყალიბებს და გამოსავალს ერთად ვიპოვით ისე, რომ ადვოკატთა ასოციაციის პოზიცია მაქსიმალურად იქნება გათვალისწინებული“. - ამბობს გედევან ფოფხაძე.

შეგახსენებთ, რომ დღეს პარლამენტთან ადვოკატთა კორპუსის საპროტესტო აქცია გაიმართა. ადვოკატთა კორპუსი "სისხლის სამართლის საპროცესო კოდექსში"შესატან ცვლილებებს აპროტესტებს. ადვოკატთა ასოციაციის თავმჯდომარის ზაზა ხატიაშვილის თქმით, პარლამენტმა აღნიშნულ კანონზე დადებული პრეზიდენტის ვეტო არ უნდა დაძლიოს.სისხლის სამართლის საპროცესო კოდექსში შესატან ცვლილებებს პრეზიდენტმა ვეტო ადვოკატების თხოვნით დაადო.