სიცოცხლესთან შეუთავსებადი ტრამვების გამო, 28 თებერვალს სოსო ქიმერიძე გარდაიცვალა. იგი ხაშურის რაიონული ადმინისტრაციული შენობის მესამე სართულიდან გადმოვარდა, რის შედეგადაც სხეულის მრავლობითი დაზიანება მიიღო და დაიღუპა. თუმცა ამ ფაქტს არ ეთანხმებიან ოჯახის წევრები და ამბობენ, რომ ცემისას შემოაკვდათ.
ქუთაისელმა ბლოგერებმა აღნიშნულ ტრაგედიასთან დაკავშირებით მერიის წინ აქცია გამართეს და გარდაცვალების გარემოების დეტალური გამოძიება მოითხოვეს.
„დაირღვა ადამიანის უფლებები, შინაგან საქმეთა სამინისტროს დასკვნა არის ბუნდოვანი. ჩვენ მოვითხოვთ, რომ გამოძიებულ იქნას აღნიშნული ტრაგედია. პოლიცია ხალხზე უნდა ზრუნავდეს,“ - ამბობს აქციის ორგანიზატორი თამარ რაზმაძე.
„ჩვენ ვაპროტესტებთ უსამართლო ხელისუფლების მოქმედებას, რომელმაც უამრავი ადამიანი შეიწირა. ერთ-ერთი არის სოსო ქიმერიძე. ამბობენ, რომ ეს უბედური შემთხვევა იყო, ხოლო, სინამდვილეში, მას სხეულზე ცემის კვალი აღენიშნება,“ - აღნიშნა აქციის მონაწილე ვანო ჟორჟოლიანმა.
აქციას ქუთაისელი ჟურნალისტებიც შეუერთდნენ.