„ცხელა და პირდაპირ საქმეზე გადავალ“ - ამ სიტყვებით დაიწყო განათლების და მეცნიერების მინისტრმა დიმიტრი შაშკინმა 8 წუთიანი შეხვედრა 200-მდე თბილისელ და რეგიონიდან ჩამოსულ პედაგოგთან.
„საქართველოს პრეზიდენტმა მთავრობის ბოლო სხდომაზე ბრძანა, რომ ბევრი არის გასაკეთებელი ზაფხულის პერიოდში. ასე რომ, სასწავლო პროცესის დაწყებამდე ეს პრობლემები ახლავე უნდა იქნას მოგვარებული. მივიღეთ ლოჯისტიკური გადაწყვეტილებები, რომელიც მინდა, თქვენ გითხრათ და შემდეგ მოვისმინო თქვენი აზრი ამასთან დაკავშირებით“ - მიმართა პედაგოგებს მინისტრმა.
სამუშაო შეხვედრაზე დიმიტრი შაშკინმა პედაგოგებს მიაწოდა ინფორმაცია იმ სიახლეებზე, რომლებიც სექტემბრიდან უნდა დაინერგოს სკოლებში. ერთ-ერთი ასეთი საკითხია ტრიმესტრული სწავლების შეცვლა და სემესტრულ სწავლებაზე გადასვლა. მან მასწავლებლებს ასევე შესთავაზა სწავლის დაწყების და დასრულების თარიღი, რასაც დარბაზში მყოფთა უკმაყოფილება მოჰყვა. სასწავლო პროცესი 15 სექტემბერს დაიწყება და 15 ივნისს დასრულდება (მინისტრის თქმით, 15 სექტემბერი შეირჩა ტურისტული სეზონის გათვალისწინებით). მოსწავლეებს მთელი წლის განმავლობაში ორი დიდი არდადეგები ექნებათ, ერთი - ზამთრის და მეორე - სააღდგომო.
ერთ-ერთი სიახლე, რომელიც პედაგოგებთან შეხვედრაზე გაჟღერდა, მოსწავლეთა ცოდნის შეფასებას ეხებოდა. მომავალი სასწავლო წლიდან მასწავლებლებს მოსწავლის შეფასებისთვის აღარ მოუწევთ პროცენტული მაჩვენებლის გამოყვანა. შეფასება სამი კრიტერიუმით მოხდება: საშინაო, სასკოლო დავალებებისა და საკონტროლო სამუშაოების შესრულების მიხედვით. შეიცვლება სასკოლო ჟურნალების დიზაინიც და შეფასებები დაფიქსირდება შესაბამის სამ გრაფაში.
ბიუროკრატიული და სხვა ბერკეტები არ უნდა არსებობდეს სკოლაში. „მასწავლებელი დროს კარგავდა კალკულატორზე პროცენტების გამოყვანით, იმის მაგივრად, რომ მოსწავლეებთან მუშაობით დაკავებულიყო. ამიტომ, მასწავლებლების თხოვნით, ჩვენ გადავდივართ შეფასების უფრო გამარტივებულ სისტემაზე, სადაც არ იქნება პროცენტული მაჩვენებელი და სამივე კომპონენტს ექნება ერთნაირი წონა, რაც შესაძლებლობას მისცემს მასწავლებელს, იმის მაგივრად, რომ იჯდეს კალკულატორით და პროცენტები გამოთვალოს, ასწავლოს ბავშვს, ჩვენ კვლავ გადავდივართ სემესტრების პროცედურაზე... ეს შექმნის ყველა პირობას იმისთვის, რომ განათლების ხარისხი იყოს განვითარებული და გაზრდილი ჩვენს ქვეყანაში. საშინაო დავალება,საკლასო სამუშაო და საკონტროლო - სამი კომპონენტი იქნება, ერთნაირი წონის. ეს სისტემა იქნება ტრანსპარენტული და პირველ რიგში მოსწავლეებისათვის და ყველა მოსწავლეს ეცოდინება, რომ მისი ცოდნა არ დაიკარგება,“ - განაცხადა შაშკინმა.
ახალი სასწავლო წელი იმითაც იქნება გამორჩეული, რომ სკოლები განათლების და მეცნიერების სამინისტროს მიერ გრიფირებული წიგნებით იხელმძღვანელებენ. განათლების და მეცნიერების სამინისტრომ უკვე დაადგინა სახელმძღვანელოებისთვის ერთიანი ტექნიკური სტანდარტი და გაამკაცრა სახელმძღვანელოს გრიფირების წესი. გრიფირებული სახელმძღვანელოები უცვლელი უნდა იყოს 5 წლის განმავლობაში. ამასთან დაკავშირებით ეროვნული სასწავლო გეგმებისა და შეფასების ცენტრის დირექტორმა ნათია ჯოხაძემ ჩვენთან საუბრისას განაცხადა, რომ გრიფირებული სახელმძღვანელოების ფასებს განათლების და მეცნიერების სამინისტრო დაარეგულირებს და ის ყველა მშობლისთვის ხელმისაწვდომი იქნება.
ცვლილება, რომელიც საკამათო თემა ნამდვილად არ გამხდარა ამ შეხვედრაზე, მიუხედავად იმისა, რომ რამდენიმე დირექტორიც ესწრებოდა ამ შეხვედრას, სამინისტროს მიერ დირექტორების დანიშვნაა. „ეს არის პრობლემა, რომელიც მოდის ლოტოტრონებიდან. როგორც იცით, ლოტოტრონებმა ვერ გაამართლა. ამის შემდეგ იყო შექმნილი სამეურვეო საბჭოები, ახლა ჩვენ სისტემაში გვყავს დირექტორის მოვალეობის 40% შემსრულებელი. ჩვენ გვინდა, რომ დირექტორი იყოს მოქნილი და პასუხისმგებელი სკოლაში ყველაფერ იმაზე, რაც ხდება. ამიტომ, იმისათვის, რომ პროცესი იყოს ჩქარი, ჩვენ ვთავაზობთ საზოგადოებას, დირექტორი იყოს დანიშნული, რადგან დიდი დროა საჭირო, სანამ ჩატარდება არჩევნები, მანამდე დირექტორის მოვალეობას ასრულებს მოვალეობის შემსრულებელი და, როგორც მოგეხსენებათ, ისინი ვერ არიან საკმარისად პასუხისმგებელი. მსოფლიოში არის არჩეული დირექტორებიც და დანიშნული დირექტორებიც, ამერიკაში არის დანიშნული და არჩეული დირექტორები. ჯერჯერობით, მე ვერ ვნახე შედეგი სამეურვეო საბჭოების მიერ არჩეული დირექტორების,“ - განაცხადა დიმიტრი შაშკინმა ჟურნალისტებთან საუბრისას.
რამდენად გახდება გამოსავალი სამეურვეო საბჭოებისთვის სხვადასხვა ფუნქციების წართმევა და ამ შემთხვევაში დირექტორის არჩევა, ესეც ბუნდოვანი საკითხია და კიდევ ერთი გადადგმული ნაბიჯი სკოლების თვითმმართველობების დეცენტრალიზაციისთვის. ამ საკითხზე კომენტარის გაკეთება ილიას უნივერსიტეტის პროფესორს სიმონ ჯანაშიას ვთხოვეთ. „ვფიქრობ, რომ დირექტორების დანიშვნაზე საუბარი ნიშნავს სკოლების დეცენტრალიზაციის პროცესისთვის მნიშვნელოვანი საფუძვლის გამოცლას, რაც, ერთი მხრივ. ძალიან ზერელე დამოკიდებულებაა იმ მიღწევების მიმართ, რაც ბოლო 6 წლის განმავლობაში აქვს საქართველოს ყველა საერთაშორისო შეფასების შედეგად და მეორე მხრივ, გრძელვადიან პერსპექტივაში, სახელმწიფოს დაბრუნებას კორუფციის, ნეპოტიზმის, არაეფექტური მართვის, ბიუროკრატიის გაზრდის, ადგილზე მიღებული გადაწყვეტილებების კლების და სკოლების პოლიტიზირების საფრთხეებისკენ.
შეხვედრაზე ასევე ისაუბრეს სკოლების „ბრენდირების“ სისტემაზეც, რომელიც, მინისტრის აზრით, სკოლებისთვის კონკურენტუნარიანი გარემოს შექმნას ითვალისწინებს. გარკვეული კრიტერიუმების მიხედვით სკოლებს მიენიჭებათ ვარსკვლავები, მათი რაოდენობა კი სკოლის წარმატებულობის განმსაზღვრელი იქნება. როგორც მინისტრმა ჟურნალისტებთან საუბრისას განაცხადა, „ბრენდირების“ მეორე ეტაპი დაწყებულია და განათლების და მეცნიერების სამინისტროში არის შექმნილი სპეციალური კომისია, რომელიც დაადგენს კრიტერიუმებს.
სიმონ ჯანაშიას აზრით, ინიციატივა, რომელიც დაეხმარება საზოგადოებასა და სახელმწიფოს, ჰქონდეს ინფორმაცია კონკრეტული სკოლის გაწეული სერვისის ხარისხზე, მისასალმებელია, მაგრამ როგორ და რა გზებით უნდა მოხდეს ამ პროგრამის განხორციელება, მისთვის უცნობია. „თქმა ჯერ ძნელია, რადგან მიუხედავად იმისა, რომ მინისტრი აცხადებს, რომ ძალიან ბევრი იმუშავეს ამასთან დაკავშირებით, არანაირი დაწერილი დოკუმენტი არ გავრცელებულა, რომელიც ახსნიდა, რა მიზნით, რა მექანიზმებით, რა საფრთხეების გათვალისწინებით და რა ფინანსური დანახარჯებით აპირებენ ამის გაკეთებას?“ - კითხულობს სიმონ ჯანაშია.
პედაგოგებთან შეხვედრაზე ისაუბრეს სხვა სიახლეებზე, რომელიც სექტემბრიდან დაინერგება სკოლებში. ერთ-ერთი ასეთია განსხვავებული საგნების დამატება, რაშიც გამოცდის ჩაბარება არ მოუწევთ მოსწავლეებს. დამატებითი საგნებია: სამოქალაქო განათლება და სამოქალაქო თავდაცვა და უსაფრთხოების შესწავლა. ასევე ყველა სკოლაში შევა ისტორიის დამხმარე სახელმძღვანელო, სახელწოდებით „რუსული ოკუპაციის 200 წელი“ - განათლების და მეცნიერების სამინისტროს აზრით ეს ხელს შეუწყობს მოსწავლეს, უკეთ შეისწავლონ საქართველოს ისტორია..
შეხვედრაზე ისაუბრეს მასწავლებლის სერთიფიცირების აუცილებლობაზეც და მინისტრმა განაცხადა, რომ სახელმწიფო იბრუნებს თავის პასუხისმგებლობას და იზრუნებს მასწავლებლების კვალიფიკაციის ამაღლებაზე. მასწავლებლის პროფესიული განვითარებისთვის სახელმწიფო აშენებს „მასწავლებლის სახლს“ საქართველოს სამ ქალაქში - ქუთაისში, ბათუმში და თბილისში, სადაც პედაგოგები გაეცნობიან სწავლების თანამედროვე მეთოდებს, სადაც ჩატარდება ტრენინგები, კონფერენციები და ა.შ. შეხვედრაზე არ თქმულა, თუ რამდენით მოემატებათ სერთიფიცირებულ მასწავლებლებს ხელფასი, როგორც პროფესიული გადამზადების ცენტრის ხელმძღვანელმა გია მამულაშვილმა განგვიცხადა, ამ კითხვით განათლების და მეცნიერების სამინისტროს ფინანსურ განყოფილებას უნდა მივმართოთ.
რაც შეეხებათ მასწავლებლებს, მხოლოდ ორმა ისურვა ჩვენთან კომენტარის გაკეთება. მათი აზრით, რაც უფრო მალე დაინერგება სიახლეები, ეს უფრო მეტად დააჩქარებს განათლების ხარისხის განვითარებას.
„ბევრი სიახლე გაჟღერდა, რასაც მივიტან ჩემს კოლექტივში და, ალბათ, ეს სიახლეები მათში დადებით შეფასებებს გამოიწვევს. განსაკუთრებით მომწონს სემესტრულ სწავლებაზე დაბრუნება და ისიც, რომ მასალის 60% განათლების სამინისტროს მიერ იქნება დამტკიცებული. მისასალმებელია, რომ შეიცვალა მოსწავლის შეფასების სისტემა, ეს მასწავლებელს ძალიან გაუმარტივებს საქმიანობას,“ - გვითხრა ქუთაისის მე-13 საჯარო სკოლის მასწავლებელმა ნატალია სანდუხაძემ.
რამდენად წარმატებით განხორციელდება რეფორმები და ეყოფა თუ არა ასე მცირე დრო ხარისხობრივ ცვლილებებს, ამას დრო გამოაჩენს.
შორენა ტყეშელაშვილი