დაისვენე კურორტ ახალდაბაში
დაისვენე სასტუმრო „ლუტრეზიში“
სპონსორი: PSnewsGE
მიხეილ ჩხენკელმა მედიაწიგნიერების კვირეული გახსნა
ავტორი: PS („პოსტსკრიპტუმი“)
2021/10/26 22:59:00

საქართველოს განათლებისა და მეცნიერების მინისტრმა მიხეილ ჩხენკელმა მედიაწიგნიერების კვირეული გახსნა, რომელიც საქართველოში პირველად ტარდება დისტანციურ ფორმატში. კვირეულის მიზანია, გაეროს წევრ ქვეყნებში გაიზარდოს ცნობიერება მედიაწიგნიერების საჭიროებებისა და როლის შესახებ.

 

მიხეილ ჩხენკელმა დამსწრე საზოგადოებას სიტყვით მიმართა და ახალგაზრდებში მედიაწიგნიერების უნარების განვითარების მნიშვნელობაზე ისაუბრა:

 

„ჩვენ ტექნოლოგიური მიღწევების ეპოქაში ვცხოვრობთ. 21-ე საუკუნე ინფორმაციული ეპოქაა. დღეს, როგორც არასდროს, ხელმისაწვდომია დიდი რაოდენობით ინფორმაცია. ეს თავისთავად ძალიან კარგია, თუმცა ინფორმაციის დიდი მოცულობა გამოწვევების წინაშეც გვაყენებს და პასუხისმგებლობასაც გვაკისრებს.

 

მსოფლიო პანდემიის პირობებში, ბევრად მეტად გავხდით დამოკიდებულები ციფრულ ტექნოლოგიებზე და ინტერნეტ სამყაროზე, რამაც ბევრ შესაძლებლობასთან ერთად, გამოწვევებიც გააჩინა. ცხადია, ტექნოლოგიების განვითარებასთან ერთად მატულობს მათი მოხმარების სიხშირე და მასშტაბები. ასეთ დროს სასიცოცხლოდ მნიშვნელოვანია მომავალ თაობას გადავცეთ ის უნარ-ჩვევები და კომპეტენციები, რაც მათ თანამედროვე სამყაროში სრულფასოვნად და უსაფრთხოდ ცხოვრების, ინფორმირებული და სწორი გადაწყვეტილებების მიღების შესაძლებლობას მისცემს. მედიაწიგნიერება ერთ-ერთი ცენტრალური გამჭოლი კომპეტენციაა, რომელიც დაკავშირებულია კრიტიკულ, შემოქმედებით აზროვნებასთან,  მოსწავლეს ეხმარება, თავი გაართვას ინფორმაციის ულევ ნაკადს,  გაფილტროს და შექმნას ახალი ინფორმაცია. ინტერნეტსამყაროში და სოციალურ ქსელებში ინფორმაციასთან ურთიერთობისას მოსწავლისთვის მნიშვნელოვანია მედიაწიგნიერების საფუძვლიანად განვითარებული უნარები, რაც მას მისცემს საშუალებას, თავი დაიცვას დეზინფორმაციისგან და მავნე გავლენისგან. მედიაწიგნიერება არის პასუხი ციფრული საუკუნის გამოწვევებზე. მედიაწიგნიერი ახალგაზრდა თაობა სწორად იკვლევს გზას ინფორმაციის სამყაროში.

 

განათლებისა და მეცნიერების სამინისტროს აკისრია მნიშვნელოვანი როლი პედაგოგებისა და მთლიანად სასკოლო საზოგადოების მედიაწიგნიერების უნარების განვითარების საქმეში. ჩვენ აქტიურად ვმუშაობთ ამ მიმართულებით, რათა ბავშვებში სკოლის ასაკიდანვე შევუწყოთ ხელი შესაბამისი უნარების განვითარებას. ძალიან სასიხარულოა, რომ საქართველოში მედიაწიგნიერების მიმართულებით არაერთი პროექტი ხორციელდება ჩვენი საერთაშორისო პარტნიორების მხარდაჭერით“, – აღნიშნა მიხეილ ჩხენკელმა.

 

მედიაწიგნიერების გლობალური კვირეული გაეროს მიერ მიღებული რეზოლუციის ფარგლებში 25-29 ოქტომბერს ტარდება. მასში მონაწილეობას იღებენ საერთაშორისო ორგანიზაციების, დიპლომატიური კორპუსისა და კომუნიკაციის კომისიის წარმომადგენლები. პლენარული სესიების თემატიკა სასკოლო საზოგადოებისთვისაა გათვლილი და თანაბრად საინტერესოა, როგორც მასწავლებლებისთვის, ასევე მშობლებისა და მოსწავლეებისათვის.

 

კვირეულის ფარგლებში საერთაშორისო პარტნიორებისა და ექსპერტების მონაწილეობით ტარდება ორი კონფერენცია, რომელთა მიზანია ისეთი აქტუალური საკითხების განხილვა, როგორებიცაა დეზინფორმაცია, უსაფრთხო ინტერნეტი, სიძულვილის ენა, სიტყვის თავისუფლება და მედიის მიუკერძოებლობის სტანდარტები. ასევე, შეჯამდება მედიაწიგნიერების მიმართულებით საქართველოში განხორციელებული საქმიანობა და პროექტები. გარდა კონფერენციებისა, მედიაწიგნიერების კვირეულის ფარგლებში განხორციელდება სხვადასხვა საგანმანათლებლო და ცნობიერების ასამაღლებელი ღონისძიება მოსწავლეების, სტუდენტებისა და პედაგოგებისთვის თბილისსა და რეგიონებში.

 

მედიაწიგნიერების კვირეული კომუნიკაციების კომისიის ორგანიზებით ტარდება და მასში ჩართული არიან განათლებისა და მეცნიერების სამინისტრო, მასწავლებელთა პროფესიული განვითარების ეროვნული ცენტრი, საინფორმაციო ცენტრი ნატოსა და ევროკავშირის შესახებ, გაეროს ბავშვთა ფონდი, ევროკავშირი, საერთაშორისო ექსპერტები, არასამთავრობო ორგანიზაციები, უნივერსიტეტები და სკოლები. 

'.$TEXT['print'].'
სულ ნანახია - 1204
სხვა ამბები
ბოლოს იხილეს
დამზადებულია Pro-Service -ის მიერ
© PSnews 1995 - 2024 საავტორო უფლებები დაცულია