ქუთაისში 124-ე საარჩევნო უბანზე ხმის მიცემა რამდენიმე წუთით შეწყვეტილი იყო. ეს კი მას შემდეგ მოხდა, რაც ოპოზიციის წარმომადგენელმა შეამჩნია,  რომ შემაჯამებელი ოქმი, რომელიც წესით, დღის ბოლოს ივსება, უკვე შევსებული და მასზე ხელი მოწერილი იყო.

ამ საკითხზე საჩივარი დაიწერა. ოპოზიციის წარმომადგენლების განცხადებით, ადგილი აქვს გაყალბების უპრეცედენტო შემთხვევას, ხოლო უბნის წარმომადგენლის მტკიცებით,  ეს მხოლოდ შეცდომა იყო, რომელიც საუბნო კომისიის მდივანს “გამოუცდელობით მოუვიდა”. შევსებულ ოქმზე უკვე ხელი მოწერილი ჰქონდათ “ქართულ ოცნებასთან” აფელირებულ კომისიის წევრებს.

ქუთაისში, 124-ე საარჩევნო უბანზე ნაწილობრივ შედგენილ შემაჯამებელ ოქმთან დაკავშირებით ცესკოში განცხადება გაკეთდა.

„ქუთაისის საოლქო საარჩევნო კომისიის 124-ე საარჩევნო უბანზე ნაწილობრივ იქნა შევსებული საუბნო შემაჯამებელი ოქმი, რომელსაც უბნის 14 წევრი, მათ შორის სხვადასხვა პარტიების მიერ დანიშნული წევრები აწერენ ხელს. ოქმის ფოტო გავრცელდა სოციალურ ქსელებსა და სხვადასხვა მედიასაშუალებებშიც.

გვინდა ცალსახად განვაცხადოთ, რომ აღნიშნული წარმოადგენს გადაცდომას და ქუთაისის საოლქო საარჩევნო კომისიას ექნება შესაბამისი რეაგირება. ოქმი განადგურდება და საუბნო საარჩევნო კომისიას გადაეცემა ახალი შემაჯამებელი ოქმი.

საოლქო საარჩევნო კომისია იმსჯელებს 124-ე საარჩევნო უბანში შემაჯამებელ ოქმზე საუბნო საარჩევნო კომისიების წევრების მიერ ხელმოწერების წინასწარ გაკეთების ფაქტზე. ხოლო საუბნო საარჩევნო კომისია ხმის დათვლის პროცესის დასრულების შემდეგ შემაჯამებელ ოქმს შეადგენს და მასზე ხელმოწერები გაკეთდება კანონით დადგენილი წესით.

საარჩევნო ადმინისტრაციას ყოველთვის ექნება შესაბამისი რეაგირება მსგავსი ტიპის გადაცდომებზე და მოვუწოდებთ ყველა დონის საარჩევნო კომისიას დაიცვან საარჩევნო კანონმდებლობით გაწერილი ნორმები, რაც აუცილებელია კენჭისყრის პროცესის მაღალპროფესიულ დონეზე წარმართვისთვის", - განაცხადეს ცესკოში.