"ამ დღეებში ხშირად გაისმის ჩვენს სამეგობროში გია და მანანა ჯინჯიხაშვილების სახელი. ნიუ-იორკში მცხოვრები, წარმოშობით ქუთაისელი და - ძმა, მათი არაჩვეულებრივი ოჯახი გულნარა წიკლაურისთვის მუდამ საიმედო დასაყრდენი იყო ამერიკაში. სწორედ გია ჯინჯიხაშვილია ის ადამიანი, რომელმაც გარდაცვლილი გულიკო აღმოაჩინა და უჭირისუფლა. ნახეთ, როგორ აფასებს გულნარა წიკლაურის შემოქმედებას გია ჯინჯიხაშვილი Givi Lauren და როგორი სიტყვებით ეთხოვება იგი თანაქალაქელსა და მეგობარს."- ეს პოსტი ჟურნალისტმა ნანული ცხვედიანმა გაავრცელა დღეს სოციალურ ქსელში და სრულად გთავაზობთ გია ჯინჯიხაშვილის წერილს, საიდანაც ირკვევა, რომ ახლახანს  ნიუ-იორკში გარდაცვლილი ქართველი მხატვრის, გულიკო წიკლაურის შემოქმედებაც აუცილებლად მის სამშობლოს, საქართველოს დაუბრუნდება.

"დიდი გულისტკივილი და მწუხარებაა ჩემთვის და ჩემი ოჯახისთვის გულნარა წიკლაურის გარდაცვალება.

გულიკო იყო ადამიანი, რომლის სიძლიერისთვისაც მხოლოდ სიკვდილს შეიძლებოდა ეჯობნა და ასეც მოხდა. უამრავი სამედიცინო და სხვა კრიტიკული მდგომარეობიდან გამოსული დაფერფლილი სფინქსივით თითქოს მკვდრეთით აღდგებოდა და ისევ სრულყოფილი ენერგიით შეუდგებოდა შემოქმედებით საქმიანობას.

ჩემი აზრით გულიკო იყო აბსოლუტურად არაორდინარული, უშიშარი ხელოვანი, რომელიც შორს იყო კომერციული აზროვნებისაგან. ღრმად გრძნობდა და აანალიზებდა ადამიანის ფსიქოლოგიის კომპლექსურობას და მხატვრობის საშუალებით გადმოსცემდა მას.