საქართველოს პრეზიდენტის გიორგი მარგველაშვილის ინიციატივით, საქართველოს სახელმწიფო დროშის დღესთან დაკავშირებით, დღეს საქართველოს რამდენიმე რეგიონში დროშის აღმართვის ცერემონია გაიმართა, რომელშიც მონაწილეობა თავად საქართველოს პრეზიდენტმა მიიღო.
სახელმწიფო დროშის დღის აღნიშვნა 10:00 საათზე პრეზიდენტის სასახლიდან დაიწყო.
სახელმწიფო დროშის ეტალონი, რომელიც რამდენიმე წლის წინ, გიორგი მარგველაშვილის ინიციატივით დამზადდა, სასახლიდან საპატიო ყარაულმა გამოაბრძანა და საქართველოს პრეზიდენტმა, საქართველოს ეროვნული გმირების - გიორგი ანწუხელიძისა და ზაზა დამენიას შვილებთან ერთად აღმართა. პრეზიდენტის სასახლეში სახელმწიფო დროშის აღმართვის ცერემონიაზე სახელმწიფო ჰიმნი ანსამბლმა "შავნაბადა" შეასრულა.
დროშის აღმართვის ცერემონია გაიმართა კახეთშიც, უჯარმის ციხეზე, სადაც საქართველოს სახელმწიფო დროშა მაშველებმა აღმართეს, საქართველოს სახელმწიფო ჰიმნი კი, ვანო მჭედლიშვილის სახელობის მომღერალთა გუნდმა შეასრულა.
სახელმწიფო დროშის დღესთან დაკავშირებით დასავლეთ საქართველოს სამედიცინო ეროვნულ ცენტრს პრეზიდენტი გიორგი მარგველაშვილი ესტუმრა. ის ცენრტის ეზოში დროშის აღმართვის ცერემონიალს დაესწრო, მედპერსონალს ეს დღე მიულოცა და საჩუქრად დროშები გადასცა.
„დღევანდელი დღე უაღრესად მნიშვნელოვანისა ჩვენი ქვეყნისათვის ,რადგან აღვნიშნავთ სახელმწიფო დროშის დღეს. უკვე რამდენიმე ქალაქში გაიმართა სახელმწიფო დროშის აღმართვის ცერემონია, მათ შორის ქუთაისშიც,რომელიც არა მხოლო საქართველოს უძველესი ქალაქია, არამედ - ევროპის უძველესი ქალაქიც. მე ყველას ვულოცავ ამ დღეს და ვისურვებ,რომ საქართველოს დროშამ, როგორც დღს ფრიალებს, ასევე ამაყად იფრიალოს ევროკავშირში და ნატოში.“-განაცხადა თენგიზ ფხალაძემ საქართველოს პრეზიდენტის მრჩეველმა.
ეროვნული ცენტრის დირექტორის, ანჟელა ორჯონიკიძის თქმით, ეს დღე მათი კლინიკის 1200 -ვე თანამშრომლისთვის ძალიან მნიშვნელოვანია.
შეგახსენებთ, საქართველოს სახელმწიფო დროშა, კიდევ ორ ეროვნულ სიმბოლოსთან გერბთან და ჰიმნთან ერთად, საქართველოს ორგანული კანონის საფუძველზე იქნა შემოღებული, რომელიც ძალაში საქართველოს პრეზიდენტის მოვალეობის შემსრულებლის ხელმოწერის შემდეგ, 2004 წლის 14 იანვრიდან შევიდა. სახელმწიფო დროშის დღე კი პირველად 2012 წლის 14 იანვარს აღინიშნა.
ლიკა დევდარიანი