გავრცელდა ინფორმაცია, რომ იმერეთის რეგიონში მანდატურმა 15 წლის მოსწავლესთან სქესობრივი კავშირი დაამყარა. ”ტელეკომპანია” „მაესტრო“-ს სიუჟეტიდან ირკვევა, რომ მანდატური 40 წლისაა და რამდენიმე წელია, სკოლაში მუშაობს, 15 წლის მოსწავლე კი აღნიშნულ სკოლაში 1 წლის წინ გადავიდა. 

განათლების სამინისტროში მომხდარ ფაქტს ადასტურებენ და აცხადებენ, რომ მანდატური სამსახურიდან გათავისუფლებულია.

შსს-ში კი გამოძიება სისხლის სამართლის კოდექსის 140-ე მუხლითაა აღძრული, რაც თექვსმეტი წლის ასაკს მიუღწეველთან სქესობრივი კავშირის ან სექსუალური ხასიათის სხვაგვარ მოქმედებას გულისხმობს.

დანაშაულის დამტკიცების შემთხვევაში მანდატურს შვიდიდან ცხრა წლამდე ვადით თავისუფლების აღკვეთა ემუქრება. ამ დროისთვის საქმეზე საგამოძიებო მოქმედებები მიმდინარეობს. 

თუმცა, ცნობილი ხდება ისიც, რომ ოჯახს მამაკაცთან პრეტენზია არ აქვს და 40 წლის მამაკაცი 15 წლის გოგონას ცოლად მოყვანას გეგმავს. როგორც სხვადასხვა წყარო ამბობს, 15 წლის მოზარდი ორსულადაა.