საიტი მუშაობს ტესტირების რეჟიმში
სპონსორი: PSnewsGE
თბილისმა ნატო ვაჩნაძეს ძეგლი დაუდგა
2017/01/14 18:10:24

თბილისში, დავით აღმაშენებლის გამზირზე, მიხეილ თუმანიშვილის სახელობის კინომსახიობთა თეატრის წინ, ლეგენდარული ქართველი მსახიობის, ნატო ვაჩნაძის ძეგლი გაიხსნა.

 

ქანდაკება საზეიმოდ თბილისის მერმა, დავით ნარმანიამ, თავის მოადგილესთან, გიგა ნიკოლეიშვილთან, თბილისის საკრებულოს თავმჯდომარესთან, გიორგი ალიბეგაშვილთან და საქართველოს კულტურისა და ძეგლთა დაცვის მინისტრთან, მიხეილ გიორგაძესთან ერთად გახსნა.


ღონისძიებას ნატო ვაჩნაძის შთამომავლები – ელდარ და ნიკოლოზ შენგელაიები და ქართული კინოსა და თეატრის გამოჩენილი რეჟისორები და მსახიობები ესწრებოდნენ.


თბილისის მერმა ღონისძიებაზე მისულ სტუმრებს სიტყვით მიმართა და ქართული კინოს განვითარებაში ნატო ვაჩნაძის მიერ შეტანილ უდიდეს წვლილზე ისაუბრა.


„ნატო ვაჩნაძეს ქართული კინოს განვითარებაში ძალიან დიდი წვლილი აქვს შეტანილი. ნიშნად მისი დიდი ღვაწლის დაფასებისა, დღეს, ძველი კინოსტუდიის მიმდებარე ტერიტორიაზე, ნატო ვაჩნაძის ძეგლი გავხსენით. ეს ადგილი შეირჩა იმიტომ, რომ მისი შემოქმედების დიდი ნაწილი სწორედ აქ შედგა. დღეს აქ ძალიან ბევრმა ადამიანმა მოიყარა თავი, რადგან ნატო ვაჩნაძე ყველასათვის საყვარელი და გამორჩეული მსახიობი იყო, რომელიც, მიუხედავად იმ პერიოდის სირთულეებისა, თავისი მსახიობური ნიჭით არამარტო ჩვენს, არამედ ბევრ სხვა ქვეყანაშიც იყო ცნობილი“,- განაცხადა დავით ნარმანიამ.


ყველა დროის ულამაზეს ქართველ მსახიობ ქალად აღიარებული ნატო ვაჩნაძის ძეგლის ავტორი მოქანდაკე ლევან ვარდოსანიძეა. ნატო ვაჩნაძე 1904 წლის 14 ივნისს პოლონეთში, ვარშავაში დაიბადა. 1910 წელს კი ოჯახთან ერთად საცხოვრებლად საქართველოში გადმოვიდა. 1920-1930 წლებში იგი საბჭოთა ეკრანის მეგავარსკვლავი გახლდათ.


ნატო ვაჩნაძე იმდროინდელმა სახელგანთქმულმა რეჟისორმა, ამო ბეკ-ნაზაროვმა აღმოაჩინა. მსახიობმა პირველი როლი „არსენა ყაჩაღში“ შეასრულა. ქართული კინოს ლეგენდა არაჩვეულებრივი გარეგნობითა და არტისტულობით გამოირჩეოდა.
ნატო ვაჩნაძე 1953 წლის 14 ივნისს, საკუთარ დაბადების დღეზე, ავიაკატასტროფის შედეგად დაიღუპა. იგი დიდუბის მწერალთა და საზოგადო მოღვაწეთა პანთეონშია დაკრძალული.

 

წყარო http://kvira.ge/305414#prettyPhoto

'.$TEXT['print'].'
სულ ნანახია - 7815
სხვა ამბები
ბოლოს იხილეს
დამზადებულია Pro-Service -ის მიერ
© PSnews 1995 - 2020 საავტორო უფლებები დაცულია