5 დეკემბერს მსოფლიოში მოხალისეთა საერთაშორისო დღე აღინიშნება. გარემოსა და ბუნებრივი რესურსების დაცვის მინისტრი გიგლა აგულაშვილი მოხალისეებს შეხვდა და ეკოღონისძიებებში მათი ჩართულობის მნიშვნელობაზე ესაუბრა.
სამინისტროს ინიციატივით, თბილისის ზოოპარკში, საგანგებო სიტუაციების მართვის სააგენტოს წარმომადგენლებმა, მოხალისეებს ექსტრემალურ სიტუაციებში (წყალდიდობა, მიწისძვრა, ხანძარი, მეწყერი) უსაფრთხოების დაცვის წესების შესახებ ინსტრუქტაჟი ჩაუტარეს.
ზოოპარკის დირექციამ მოხალისეებს იმიტირებული ცრუ განგაში მოუწყო.
ღონისძიების დასასრულს, გიგლა აგულაშვილმა მოხალისეებს სიმბოლური საჩუქრებიც გადასცა.
მოხალისეთა საერთაშორისო დღე 1985 წელს გაეროს გენერალურმა ასამბლეამ დააარსა. ამ დღესთან დაკავშირებულ აქციებში სხვადასხვა ქვეყანაში მილიონობით მოხალისე მონაწილეობს. ისინი ჩართულნი არიან საერთაშორისო ინიციატივებში, კონფერენციებში, გამოფენებში და ა.შ. 5 დეკემბერს ადამიანთა უმრავლესობა მოხალისეობის სურვილს ეკოლოგიურ საკითხებთან დაკავშირებით იჩენს. სტატისტიკის მიხედვით, გარემოსდაცვით ღონისძიებებში ყოველწლიურად ყველაზე მეტი მოხალისე იღებს მონაწილეობას. გარემოს დაცვისა და ბუნებრივი რესურსების დაცვის სამინისტროს ინიციატივით, ეს ტენდენცია საქართველოშიც დაინერგა.