გარემოს დაცვის სამინისტრომ გაავრცელა ინფორმაცია, რომ თბილისში რაჭაში მოჭრილი სოჭის ხეებით დატვირთული სატვირთო ავტომობილი სპორტის სასახლესთან აღმოაჩინეს.
გარემოსდაცვითი ზედამხედევლობის დეპარტამენტის სწრაფი რეაგირების სამსახურის თანამშრომლების მიერ, თბილისში, სპორტის სასახლის მიმდებარე ტერიტორიაზე, აღმოჩენილი იქნა უკანონოდ მოპოვებული 97 ძირი სოჭის ჯიშის ხე-მცენარით დატვირთული ავტომანქანა. სარეალიზაციოდ გამზადებული სოჭი მოჭრილია აბროლაურის რაიონის სოფელ თლუღის ტყეში.
ავტომანქანის მძღოლმა, რომელიც ხე-ტყის უკანონო ტრანსპორტირებას ახორციელებდა, წინააღმდეგობა გაუწია უფლებამოსილ პირებს მოვალეობის შესრულების პროცესში.
ხე-მცენარე ჩამოერთვა კანონდამრღვევს. ავტომანქანა დალუქულია და გადაყვანილია გარემოსა და ბუნებრივი რესურსების დაცვის სამინისტროს ტერიტორიაზე.
მასალები შემდგომი რეაგირიებისთვის შესაბამის სამართალდამცავ ორგანოებს გადაეგზავნება. გარემოსთვის მიყენებული ზიანი 10 670 ლარს შეადგენს. ასევე, სამართალდამრღვევს წინააღმდეგობის გაწევისთვის დაეკისრა ჯარიმა 5 000 ლარის ოდენობით.