მერიასა და საკრებულოში ატესტაციის შედეგად ღიად დარჩენილ ვაკანსიებზე კონკურსი გამოცხადდა.
ქუთაისის მუნიციპალიტეტის თვითმმართველობის მოხელეთა საკონკურსო-საატესტაციო კომისიამ 48 ვაკანტურ პოზიციაზე გამოაცხადა კონკურსი. ამის შესახებ ქუთაისის მერმა, შოთა მურღულიამ და საკრებულოს თავმჯდომარემ, დავით დვალმა სპეციალურ ბრიფინგზე განაცხადეს.
კომისიამ კონკურსი 21 ნოემბერს გამოაცხადა. მასში მონაწილეობის მსურველებს საშუალება აქვთ, განაცხადები გააკეთონ 4 დეკემბრის ჩათვლით.
კონკურსის გავლის წესები იგივეა, რაც აქამდენ ჩატარებული კონკურსის შემთხვევაში იყო.
კონკურსში მონაწილეობის მსურველმა კანდიდატმა საკონკურსო კომისიას განაცხადი უნდა წარუდგინოს მხოლოდ ელექტრონული ფორმით საჯარო სამსახურის ბიუროს მიერ ადმინისტრირებული ვებგვერდის /www.hr.gov.ge/ მეშვეობით, განათლების ან შესაბამისი კვალიფიკაციის მოწმობა (დიპლომის ასლი); პირადობის დამადასტურებელი დოკუმენტის ასლი; სტაჟის დამადასტურებელი სათანადოდ გაფორმებული დოკუმენტი.
კანდიდატს უფლება აქვს გამოცხადებულ კონკურსში მონაწილეობის თაობაზე განაცხადი წარადგინოს არაუმეტეს, ხუთ ვაკანსიაზე. ხუთზე მეტ ვაკანსიაზე განაცხადის წარდგენის შემთხვევაში კანდიდატი მოიხსნება კონკურსიდან.
კონკურსანტებს, რომლებმაც წარმატებით გაიარეს მეორე ეტაპი, ხვალიდან მესამე,ანუ გასაუბრების ეტაპი ეწყებათ. საკრებულოს თავმჯდომარის, დავით დვალის განცხადებით, გასაუბრება ყოველ დღე ჩატარდება, ჯერ გასაუბრებას მოქმედი თანამშრომლები გაივლიან, ხოლო შემდგომში კი – დანარჩენი კონკურსანტები. გასაუბრებას კომისიის 6 ძირითად წევრთან ერთად, მე-7, არასამთვრობო ორგანიზაციების წარმომადგენელი დაესწრება.
კონკურსი სამ ეტაპად ჩატარდება: საბუთების გადარჩევა, ტესტირება და გასაუბრება; ტესტი შედგება 60 შეკითხვისგან, კანდიდატისათვის მესამე ეტაპზე გადასასვლელად მინიმალური გამსვლელი ზღვარია 70 %.