დასაქმების მსურველთა ტესტირების ეტაპი დასრულდა. ტესტირების შედეგებით უკმაყოფილო კონკურსანტებს დღის ბოლომდე აქვთ ვადა იმისთვის, რომ პრეტენზიებით გამოცდების ეროვნულ ცენტრს მიმართონ და არა - ქუთაისის მერიაში შექმნილ საპრეტენზიო კომისიას.
როგორც ქუთაისის საკრებულოს საზოგადოებასთან ურთიერთობის სამსახურში აცხადებენ, საპრეტენზიო კომისია მხოლოდ პირველი ეტაპის პრეტენზიების განსახილველად შეიქმნა და მეორე ეტაპზე წარმოქმნილი პრეტენზიების შესახებ კი კონკურსანტებმა გამოცდების ეროვნულ ცენტრს უნდა მიმართონ.
შეფასებისა და ეროვნული გამოცდების ცენტრი საზოგადოებასთან ურთიერთობი სამსახურის უფროსის, მაია გაბუნიას თქმით, გუშინ შევიდა სამი საჩივარი და დღეს მთავრდება საჩივრების მიღება.
„ამ დროისათვის ქუთაისიდან მხოლოდ სამი სააპელაციო განცხადებაა შემოსული, შედეგების გასაჩივრებისთვის კონკურსანტებს ვადა დღის ბოლომდე აქვთ. არ გამოვრიცხავ, რომ საჩივრების რაოდენობა გაიზარდოს. მას შემდეგ, რაც სააპელაციო კომისია განიხილავს პრეტენზიებს, შედეგები რამდენიმე დღეში გახდება ცნობილი.“- განაცხადა მაია გაბუნიამ.
შეგახსენებთ, რომ ადგილობრივი თვითმმართველობის მიერ გამოცხადებულ კონკურსის მეორე ეტაპზე გადასული 902 ადამიანიდან, ტესტირებაზე მხოლოდ 796 გამოცხადდა. აქედან ტესტირების ეტაპი 401-მა ატესტანტმა წარმატებით გადალახა, ხოლო ბარიერი ვერ გადალახა 53-მა ატესტანტმა.
ტესტირება 2 ნაკადად ჩატარდა: საგამოცდო ტესტები საქართველოს კანონმდებლობიდან 45, ხოლო ზოგადი უნარებიდან 15 დავალებისგან შედგებოდა.