დღეს საღამოს, ჭიათურაში მოსახლეობამ გზა გადაკეტა. ისინი ამ წუთებშიც ხმელიძის ქუჩაზე, ე. წ. საგუბრის მიდამოებში, ავტომანქანებს დაგაადგილების საშუალებას არ აძლევენ.
ადგილობრივები ითხოვენ, რომ აიკრძალოს ქალაქში მძიმეწონიანი ავტომობილებით მოძრაობა, რაც იწვევს საშინელ ხმაურს და გზის გარდა, მათ საცხოვრებელ სახლებსაც აზიანებს.
მოსახლეობა ადგილზე ელოდება მუნიციპალიტეტის გამგებელს სულხან მახათაძესა და საკრებულოს თავმჯდომარეს ალექსანდრე ციცქიშვილს. მიუხედავად იმისა, რომ საკითხი მრავალჯერ დააყენეს ჭიათურის ადგილობრივი თვითმმართველობის წინაშე, იგი დღემდე ვერ გადაწყდა მოსახლეობისთვის მისაღები შედეგით. ადგილობრივები პროტესტის შეწყვეტას მანამ არ აპირებენ, ვიდრე ქუჩა ხმაურისა და მანგანუმის მტვრისაგან არ გათავისუფლდება.