ქუთაისის საკრებულოს ლეიბორისტი წევრის, სამსონ გუგავას აზრით, არასტაბილური ვითარება საჯარო სამსახურებში დასაქმებულ ადამიანებს „შინაგანი მოქნილობისაკენ“ - უფროსებისადმი მლიქვნელობისა და ფარისევლობისაკენ უბიძგებს.
მისი თქმით: სტრუქტურებში დასაქმებულ ადამიანებს მყარი გარანტიები უნდა ჰქონდეთ, რომ თუ პროფესიონალები იქნებიან, მათ სამსახურს პოლიტიკური ცვლილებების გამო საფრთხე არ დაემუქრება. - „ახალი სტანდარტები საქმის კეთების მოთხოვნაში უნდა დავნერგოთ და არა უფროსებთან ურთიერთობაში, თუ ვინ უფრო კარგი ბიჭი გამოჩნდება“ -აცხადებს გუგავა.
დეპუტატი აცხადებს: "მიუხედავად იმისა, რომ მმართველობაში ახალი გუნდი მოდის, არა არის საჭირო დამლაგებლის დონემდე ცვლილებების გატარება."
ქუთაისის საკრებულოს ლეიბორისტი წევრი უპასუხისმგებლოს უწოდებს მთავრობის გადაწყვეტილებას თვითმმართველობებში სავალდებულო რეორგანიზაციის შესახებ.
როგორც მან „P. S” -ს განუცხადა: „ მართალია, ერთის მხრივ, ვეთანხმები, რომ ქუთაისის მართვას არ სჭირდება 800 - დან ათასამდე თანამშრომელი. მეორეს მხრივ, კი როცა ჩვენს ქვეყანაში ადმინისტრაციული სამსახურები დასაქმების ლამის ერთადერთ ადგილად არის ქცეული, ქუთაისში 400- დან 600 ადამიანს სამსახურის გარეშე დარჩენა ემუქრება.“
გუგავას თქმით, არა აქვს მმნიშვნელობა თუ რომელი მთავრობას ემსახურებოდნენ ეს ადამიანები . მით უფრო, რომ მათთვის არც ალტერნატიული სამსახურის შეთავაზებაა შესაძლებელი და ქვეყანაში არც უმუშევართათვის კომპესაციის გაცემაა გათვალისწინებული.