საქართველოს პრემიერ–მინისტრის, ირაკლი ღარიბაშვილის ინიციატივით, საჯარო სამსახურებში მუშაობა უნდა დაიწყოს დილის 9 საათზე. ეს ინიციატივა პრემიერმა მთავრობის სხდომაზე გააჟღერა.
„დღეს საჯარო სამსახურებში მუშაობა იწყება 10 საათზე, გამოვდივარ ინიციატივით სამუშაო საათები დაიწყოს 9 საათზე, რადგან მიმაჩნია, რომ 10 საათი არის გვიან,"- განაცხადა ირაკლი ღარიბაშვილმა.
საქართველოს პრემიერ-მინისტრმა განმარტა, რომ აღნიშნული ინიციატივა რა თქმა უნდა არ ეხებათ უწყებებს, რომლებსაც აქვთ განსაკუთრებული რეჟიმი. ესენია - შინაგან საქმეთა სამინისტრო, ფინანსთა სამინისტროს სპეციალური დანაყოფი, სასჯელაღსრულება...
ირაკლი ღარიბაშვილმა მთავრობის წევრებს მოუწოდა განიხილონ აღნიშნული ინიციატივა და მიიღონ შესაბამისი გადაწყვეტილება, რათა საჯარო უწყებებში მოხდეს მუშაობის უფრო ადრე დაწყება.