ლეიბორისტული პარტიის ქუთაისის ორგანიზაციის თავმჯდომარემ, სამსონ გუგავამ, ქალაქის მერობის და მაჟორიტარობის კანდიდატები დაასახელა.
ქალაქის მერობისთვის გამართულ მარათონში ლეიბორისტების სახელით ირაკლი კიკვაძე იბრძოლებს. რაც შეეხება მაჟორიტარ დეპუტატებს, დასახელებული 10 კანდიდატიდან, ერთ-ერთი, სიის მესამე ნომრად წარდგენილი უხუცესი გივი გურეშიძეა. 85 წლის კანდიდატი „საფიჩხიის" მაჟორიტარობისთვის იბრძოლებს.
„ჩვენი მიზანია ქუთაისს სიცოცხლისუნარიანობა დავუბრუნოთ. გამარჯვების შემთხვევაში ჯანდაცვა, დასაქმება და განათლება ჩვენი უმთავრესი პრიორიტეტი გახდება. ამკუთხით საკმაოდ სოლიდური პროექტების განხორციელებას ვგეგმავთ, ვაპირებთ საბინაო ფონდის შექმნას რათა დავასაქმოთ უსახლკაროდ დარჩენილი ხალხი. ქუთაისი საჭიროებს ახალ სისხლს და ახლებურ განვითარებას, იგი სპორტის განვითერების ცენტრად უნდა ვაქციოთ,"-განაცხადა მერობის კანდიდატმა ირაკლი კიკვაძემ.
„სიმბოლურად, შევაჩიეთ ილიას ძეგლი და 20 რიცხვი სიის პრეზენტაციისთვის, ჩვენი საარჩევნო ნომრის შესაბამისად, ჩვენ ილიას მსგავსად ვზრუნავთ ქვეყნის გამარჯვებისთვის, იმედი გვაქვს ამ არჩევნებზე წარმატებას მივაღწევთ, მზად ვართ, ავიღოთ პასუხისმგებლობა ქალაქის მართვაზე," – განაცხადა „ლეიბორისტული პარტიის“ რაიონული ორგანიზაციის თავმჯდომარემ, საარჩევნო სიის პირველმა ნომერმა სამსონ გუგავამ.