პარტია "პატრიოტთა ალიანსის" ქუთაისის შტაბის უფროსმა, გოგიტა გოგელაშვილმა პარტია დატოვა, მიზეზად მის დაუკითხავად, პროპორციულ სიაში ყოფილი „ნაციონალების“ ჩაწერას ასახელებს.
"ჩემი უშუალო მოთხოვნა იყო, რომ ეროვნული იდეოლოგია დაგვეცვა, ამისათვის პარტიაში უნდა იყონ ის ადამიანები, ვისაც ხელეწიფებათ საქმის გაკეთება და არა მხოლოდ თანანმდებობის შენარჩუნებაზე ფიქრი. სიაში ისეთები შეიყვანეს, რომლებიც მრავალჯერ იყვნენ წარსულის რიგებში, მაგრამ ახლა ისევ ამ ადამიანებით ხდება საარჩევნო სიების დაკომპლექტება, მითუმეტეს, მე როგორც შტაბის უფროსი არაფრად ჩამაგდეს და არც კი მკითხეს ისე შეადგინეს სია,"-განაცხადა გოგიტა გოგელაშვილმა.
მისი განცხადებით, თუ არ გაითვალისწინებენ მის შენიშვნებს პარტიაში ის პარტიის რიგებსაც დატოვებს.
გოგიტა გოგელაშვილის თანამდებობიდან გადადგომას პარტიაში ეხმაურებიან. ფრაქცია „პატრიოტების“ თავმჯდომარის კახა ნემსიწვერიძის თქმით, გოგიტა გოგელაშვილი შტაბის უფროსი არც არასოდეს ყოფილა.
„გოგიტა გოგელაშვილი არც არასოდეს ყოფილა შტაბის უფროსი და როგორ და რა თანამდებობიდან გადადგა არ ვიცი. პარტიის ქუთაისის რაიონული ორგანზიაცია 15 მაისს გამართავს ბრიფინგს და დაასახელებს, როგორც შტაბის უფროსის, ასევე მერობის და პროპორციული და მაჟორიტარობის კანდიდატების სიებს, ჯერ ჩვენც არ ვიცით როგორი იქნება სია და საიდან მოიტანა გოგელაშვილმა ეს ინფორმაცია,“- აცხადებს ნემსიწვერიძე.