უჩვეულოდ ნალექიანობის გამო საჩხერის მუნიციპალიტეტის რამდენიმე სოფელში მეწყრის ჩამოწოლის შემთხვევები დაფიქსირდა.
საჩხერის მუნიციპალიტეტის სოფელ ორღულში მიწის მასივი მოწყდა და მეწყერი ჩამოწვა. სტიქიამ დააზიანა საცხოვრებელი სახლი, შიდა სასოფლო გზა, რომლითაც რამდენიმე ოჯახი სოფლის ცენტრს უკავშირდებოდა, სათავე ნაგებობასთან დამაკავშირებელი წყლის ცენტრალური მილი, რომლითაც სასმელი წყლით ასეულობით ოჯახი მარაგდებოდა.
დაზარალებული ოჯახი სტიქიის ზონიდან დაუყოვნებლივ იქნა გაყვანილი. სიფრთხილის მიზნით, ევაკუირებული იქნა სტიქიის მიმდებარე ტერიტორიაზე მცხოვრები რამდენიმე ოჯახიც.
ორღულში მოსახლეობას შეხვდნენ საქართველოს რეგიონული განვითარებისა და ინფრასტრუქტურის მინისტრის მოადგილე, თემურ მურღულია, ინფრასტრუქტურის განვითარების დეპარტამენტის უფროსი, ავთანდილ სუდაძე, საჩხერის მუნიციპალიტეტის საკრებულოს თავმჯდომარე ინგა ზაბახიძე, საჩხერის მუნიციპალიტეტის გამგეობის წარმომადგენლები.
ორღულის მოსახლეობამ ხელისუფლებისაგან დახმარების დაპირება მიიღო.