ქუთაისის დემოკრატიული ჩართულობის ცენტრში "საერთაშორისო გამჭვირვალობა-საქართველოს" წარმომადგენლებმა კამპანიის "ეს შენ გეხება"- ს ფარგლებში პარტნიორ ორგანიზაციებთან შეხვედრა გამართეს.

 "საერთაშორისო გამჭვირვალობა-საქართველოს" ქუთაისის ფილიალის წარმომადგენლების განცხადებით, ე.წ. უკანონო "მიყურადების" წარმოება საქართველოში ბოლო რამდენიმე წელია პრობლემას წარმოადგენს და სპეციალური ტექნიკური საშუალებებით საგამოძიებო ორგანოები ყოველგვარი ნებართვის გარეშე უსმენდნენ და   უსმენენ საქართველოს რიგით მოქალაქეებს, ჟურნალისტებს, სამოქალაქო სექტორის წარმომადგნლებს, პოლიტიკურ აქტივისტებს, სასულიერო და სხვა პირებს. 

როგორც არასამთავრობო ორგანიზაციის წევრები ამბობენ,  აუცილებელია საქართველოს პარლამენტმა დროულად მიიღოს კანონი, რომლითაც საქართველოში საბოლოოდ შეწყდება უკანონო მოსმენები.

" ეს შენ გეხება"-ს გააქტიურება გამოიწვია იმან, რომ საზოგადოებაში ისევ არის ეჭვი მოსმენებთან დაკავშირებით. ჩვენ, ვალდებულები ვართ, რომ შესაბამის ორგანოებს ვაცნობოთ ამ უკანონობის შესახებ, ამიტომ ვგეგმავთ აქტიურ კამპანიას",-განაცხადა  სამართლაინი არჩევნების რეგიონალურმა კოორდინატორმა თეონა გოგიშვილმა.

კამპანია "ეს შენ გეხება" 2012  წლის თებერვალში არასამთავრობო და მედიაორგანიზაციებმა ერთად წამოიწყეს. ამჯერად, ისინი გეგმავენ შესაბამისი ღონისძიებების ჩატარებას საქართველოში "მოსმენების" დასაგმობად. კერძოდ, 19 მარტს იგეგმება მშვიდობიანი აქცია შესაბამისი ტრანსფარანტებით, მაისურებით, შეგროვდება ხელმოწერები.

არასამთავრობო ორგანიზაციების წარმომადგენლების თქმით, უკანონო მოსმენები საფრთხეს უქმნის პირადი ცხოვრების ხელშეუხებლობის კონსტიტუციური გარანტიის დაცვას და ქვეყანაში დემოკრატიული პრინციპების დამკვიდრებას. ამიტომ, საზოგადოებამ ხმა უნდა აიმაღლოს და გამოვიდეს ამ უკანონობის წინააღმდეგ .

აღნიშნული აქცია 19 მარტს ქუთაისში, ბათუმსა და ზუგდიდში გაიმართება.