დღეს ჯანდაცვის მინისტრმა პაციენტთა გეგმურ მომსახურებასთან დაკავშირებით განცხადება გააკეთა. მისი განმარტებით, გეგმური მომსახურების მისაღებად დაცდის პერიოდი საშუალოდ ორ კვირას შეადგენს. მინისტრი აღნიშნავს, რომ სიმართლეს არ შეესაბამება ბოლო პერიოდში ვრცელებული ინფორმაცია, თითქოს დაცდის პერიოდი რამდენიმე თვეს შეადგენს. „თუ ასეთი შემთხვევები იქნება, შევისწავლით, პაციენტებს რიგში ლოდინი აღარ მოუწევთ,“ – აცხადებს სერგეენკო.
დავით სერგეენკო, ჯანდაცვის მინისტრი: „ვრცელდება ინფორმაცია, რომ არის ხანგრძლივი დაცდის პერიოდები. შესაბამისად, თითქოს საყოველთაო ჯანდაცვის ეფექტურობა დაბალია. აცხადებენ, რომ თვეების განმავლობაში გვიწევს პაციენტებს რიგში ლოდინიო. მე ჩემს სიტყვებზე პასუხს ვაგებ. დაცდის პერიოდი თვეს არ აღემატება და, საშუალოდ, ორ კვირას შეადგენს. სამწუხაროდ, გვაქვს შემთხვევები, როდესაც პაციენტი მიდის ექიმთან საგარანტიო წერილით, მას ეუბნებიან, რომ ნუ ისარგებლებენ ამით, რადგან მრავალი თვე დაგჭირდება და ჯობია, პირდაპირ თანხა გადაიხადოთო. ეს არის არამარტო პროექტის დისკრედიტაცია, არამედ პაციენტის ჯანმრთელობისა და სიცოცხლისთვის საფრთხის შექმნა. ამ შემთხვევებს ჩვენ შევისწავლით. ეს მიუღებელია და თუ სადმე დადასტურდა ასეთი შემთხვევა, მას კანონის შესაბამისი რეაგირება მიეცემა.“