საიტი მუშაობს ტესტირების რეჟიმში
სპონსორი: PSnewsGE
თომას ჰამერბერგი :"ხელისუფლება არ უნდა ერეოდეს ადამიანის პირად ცხოვრებაში"
ავტორი: ეთერ ბალაძე
2014/02/14 19:42:25

დღეს ადამიანის უფლებების დაცვისა და პირადი ცხოვრების ხელშეუხებლობის შესახებ პროექტის პრეზენტაცია  „ქორთიართ მერიიოტში“ გაიმართა  აღნიშნულ კანონპროექტს მთავრობა და პარლამენტი უახლოეს დღებში დაამტკიცებს. პროექტის განხილვის პროცესში ჩართული  არიან არასამთავრობო ორგანიზაციის  წარმომადგენლები და უცხოელი უფლებადამცველები.

 

პროექტის განხილვას პრემიერ-მინისტრი ირაკლი ღარიბაშვილიც დაესწრო, რომელმაც განაცხადა, რომ  ადამიანის უფლებები საქართველოს მთავრობის ერთერთი მთავარი პრიორიტეტია და საქართველო ყველანაირად ეცდება ევროპული ქვეყნების საუკეთესო გამოცდილება გაიზიაროს ადამიანის უფლებათა დაცვის კუთხით:

 

 ირაკლი ღარიბაშვილი  (პრემიერ-მინისტრი):

 

 _ძალიან სასიხარულოა, რომ დღეს ჩვენ ერთმანეთს ვხვდებით ისეთ მნიშვნელოვან საკითხზე სასაუბროდ, როგორიც არის ადამიანის უფლებები. ეს არის ის ფუნდამენტი, რომელზეც დგას ევროპული ტიპის სახელმწიფო და ჩვენთვის მეტად საამაყოა, რომ ამით ვიწყებთ ჩვენს ქვეყანაში დემოკრატიის მშენებლობას და განმტკიცებას.

ჩვენ კარგად გვესმის, რომ საქართველომ სწორება უნდა აიღოს ევროპული ქვეყნების საუკეთესო გამოცდილებაზე. დღევანდელი დღე იმის დასტურია, რომ ჩვენს გუნდს აქვს პოლიტიკური ნება საიმისოდ, რომ დასახულ მიზანს რეალურად მივაღწიოთ. სულ მალე  ამოქმედდება ეს სტრატეგია და ჩვენი გუნდი ყველაფერს გააკეთებს იმისათვის, რომ  საქართველოში დამყარდეს ევროპული ადამიანის უფლებების შესაბამისი სტანდარტებიგანაცხადა ირაკლი ღარიბაშვილმა.

 

საქართველოს იუსტიციის მინისტრის, თეა წულუკიანის განცხადებით, საქართველოს ძალიან ცუდი გამოცდილება გააჩნია ადამიანის უფლებათა დარღვევის კუთხით, როგორიც იყო ციხეებში შექმნილი მდგომარეობა. თუმცა, დღეს სიტუაცია შეცვლილია და ადამიანის უფლებათა ევროპულ სასამართლოში პატიმრების მხრიდან არც ერთი საჩივარი არ შესულა:

 

თეა წულუკიანი (იუსტიციის მინისტრი):

 

 _ ამ სტრატეგიის შესრულებაზე იქნება დამოკიდებული შედეგი, რომელსაც ქვია თანამედროვე ტიპის სახელმწიფოდ ჩამოყალიბება ჩვენი ქვეყნისა. რა თქმა უნდა, ჩვენი მთავრობის პრიორიტეტი არის ქვეყნის ეკონომიკური კეთილდღეობა, მაგრამ აგრეთვე პრიორიტეტია ადამიანის უფლებები, რადგან  სწორედ ის ქვეყნები არიან ევროპული ქვეყნები, სადაც ადამიანის უფლებები არის დაცული. ჩვენს მთავრობაში არის ყოფილი ომბუდსმენი, რით ყველაფერია ნათქვამი, როდესაც მთავრობა აქცევს თავის პრიორიტეტად ადამიანის უფლებებს", – განაცხადა თეა წულუკიანმა.

 

დღევანდელ პრეზენტაციაზე წარმოდგენილი გეგმა და სტრატეგია არ წარმოადგენს იმ საბოლოო ვარიანტს, რაც პარლამენტს წარედგინება. შენიშვნები და რეკომენდაციები მთავრობას არასამთავრობო ორგანიზაციების წარმომადგენლებმა უკვე წარუდგინეს.

 

"ახალგაზრდა იურისტთა ასოციაციის" თავჯდომარე  კახა კოჟორიძე აცხადებს, მათ მიერ გაგზავნილი რეკომენდაციის გათვალისწინება მოხდება თუ არა ჯერჯერობით გაუგებარია:

 

 კახა კოჟორიძე (ახალგაზრდა იურისტთა ასოციაციის თავჯდომარე):

 

_ჩვენ გვაქვს მთელი რიგი შენიშვნები, რომელიც მიგვაჩნია, რომ მნიშვნელოვანია, გათვალისწინებული იყოს აღნიშნულ დოკუმენტში. მთავარი ჩვენი წუხილი არის ის, რომ სტრატეგიული დოკუმენტი, რომელიც მომავალ 7 წელზეა გათვლილი, უნდა ასახავდეს არსებული პრობლემების ანალიზს უფრო უკეთ, ვიდრე ეს მოცემულ შემთხვევაში გვაქვს. დოკუმენტში, რომელიც დაახლოებით 16 გვერდისგან შედგება, 13 გვერდი ეთმობა შესავალს, ჩართულობას, ისტორიული აქცენტების გაკეთბას, მაშინ, როცა ეს უნდა იყოს მინიმალიზებული და მთავარი აქცენტი უნდა იყოს გაკეთებული არსებული პრობლემების ანალიზზე. ამის გარეშე მომავალი ხედვის ჩამოყალიბება ჩემთვის ცოტა რთული წარმოსადგენია", – აცხადებს კოჟორიძე.

 

 არასამთავრობო ორგანიზაცია „საერთაშორისო გამჭირვალება“ ხელმძღვანელი  ეკა გიგაური პროგნოზს ვერ აკეთებს,   თუ  როგორი იქნება სტრატეგიის საბოლოო ვარიანტი, თუმცა ყველაზე მნიშვნელოვანია ამ დოკუმენტში ის  პუნქტი უნდა იყოს , რომელიც ადამიანის პერსონალური ინფორმაციის დაცვას შეეხება საუბარი.

 

ეკა გიგაური (არასამათვრობო ორგანიზაცია „საერთაშორისო გამჭირვალეობა“):

 

_მნიშვნელოვანია, მოხდეს პერსონალური ინფორმაციის დაცვა და ის საკანონმდებლო ცვლილებები, რომელიც უზრუნველყოფს იმას, რომ სამართალდამცავი ორგანოების მიერ არ იქნება გადამეტებული უფლებამოსილება და ისინი არ განახორციელებენ თვალთვალს ან მიყურადებას ჩვენი მოქალაქეების. თუ ეს ჩაიდება დოკუმენტში, ეს იქნება გამოხატულება იმისა, რომ არსებობს პოლიტიკური ნება ამ მიმართლებით. მეორე მნიშვნელოვანი საკითხი, ეს არის სასამართლოს რეფორმა, მოსამართლეთა დანიშვნის წესი და სამწლიანი გამოსაცდელი ვადის პერიოდში მოსამართლეთა მონიტორინგი. ვფიქრობ, რომ ეს პირდაპირ არის კავშირში სასამართლო სისტემის დამოუკიდებლობასთან", – აცხადებს ეკა გიგაური.

 

დღევანდელ შეხვედრაზე ევროკავშირის მრჩეველმა ადამიანის უფლებათა საკითხებში, თომას ჰამერბერგმა განაცხადა, რომ  მთავარია ადამიანის უფლებების დაცვის სტრატეგიასა და გეგმაში მოცემული საკითხების რეალობაში განხორციელება მოხდეს.

 

თომას ჰამერბერგი ( ევროკავშირის მრჩეველი ადამიანის უფლებათა დაცვის საკითხებში):

 

_როდესაც საუბარია ადამიანის უფლებებზე, ჩვენ გვახსენდება ყველაზე ძირეული პრინციპები, როგორიც არის კანონის წინაშე თანასწორობა, რომ ყველას ჰქონდეს ერთნაირი შესაძლებლობა, მიუხედავად მისი ქონებრივი მდგომარეობისა, წარმომავლობისა თუ სხვა განმასხვავებელი ნიშნისა. ასევე, პირადი ცხოვრების ხელშეუხებლობა.

 

 ხელისუფლება არ უნდა ერეოდეს ადამიანის პირად ცხოვრებაში. ქალები უნდა სარგებლობდნენ ყველა იმ უფლებით, რომლითაც სარგებლობენ მამაკაცები. სიტყვის თავისუფლება არის კიდევ ერთი ფუნდამენტური უფლება და, რა თქმა უნდა, უმცირესობების უფლებები. თუმცა მნიშვნელოვანია, რომ ყველა ეს უფლება იყოს არა მხოლოდ ფურცელზე დაწერილი, არამედ დაინერგოს რეალობაში. ამისათვის მნიშვნელოვანია, რომ ყველა რიგითმა ადამიანმა გააცნობიეროს რას ნიშნავს ადამიანის უფლებების დაცვა", – განაცხადა თომას ჰამერბერგმა.

 

 

 

 

 

 

 

 

 

'.$TEXT['print'].'
სულ ნანახია - 6470
სხვა ამბები
ბოლოს იხილეს
მსგავსი სიახლეები
დამზადებულია Pro-Service -ის მიერ
© PSnews 1995 - 2020 საავტორო უფლებები დაცულია