ციხეების გამკაცრება – პატიმრების წამება წიწაკის გაზით  

ადამიანის უფლებათა დაცვისა და პატიმართა სოციალური უზრუნველყოფის საერთაშორისო ორგანიზაციის თავმჯდომარემ, უფლებადამცველმა გიორგი თევზაძემ პრესკონფერენცია გამართა. მისი განცხადებით, პენიტენციალურ სისტემაში  არის მთელი რიგი საკითხები, რომელიც რეფორმირებას საჭიროებს, რაც არამხოლოდ სასჯელაღსრულების სამინისტროს, არამედ  სათანადო ექსპერტების დასკვნით და პოზიციების შეჯერებით უნდა განხორციელდეს.

როგორც უფლებადამცველი აცხადებს, სასჯელაღსრულებაში წესების გამკაცრების მიმართულებით, ნებისმიერი ცვლილება კარგად დასაბუთებული და არგუმენტირებული უნდა იყოს.

– არ შეიძლება ისეთი მეთოდების გამოყენება პატიმრების წინააღმდეგ, რომელიც უთანაბრდება ან იგივდება წამებასთან. ეს პატიმრის  მთელი რიგი უფლებების შეზღუდვაა. ყველა გამოყენებული სადამსჯელო ღონისძიება: რეზინის ხელკეტი, წიწაკის გაზი და სხვა, პატიმრისათვის შეურაცხმყოფელი და წამების ტოლფასია. თუ საფრთხის ადეკვატური ზომები უნდა მიიღოს სასჯელაღსრულების დაწესებულებამ, მაშინ  ამის აუცილებლობაც უნდა დასაბუთდეს. სამწუხაროდ, უფლებადამცველებს ნაკლებად გვაქვთ სასჯელაღსრულების დაწესებულებებში შესვლის და ფაქტების გადამოწმების შესაძლებლობა,  ნაკლებად აქვთ რეალური სურათი, თუ რა ხდება. ამდენად, არის მთელი რიგი საკითხები, რომლის გამოც ასეთი ცვლილებები საზოგადოებასთან და, განსაკუთრებით, ექსპერტებთან წინასწარი კონსულტაციების და დასაბუთების გარეშე,  ცოტა ნაჩქარევად მიგვაჩნია. ასევე,  ვერ გავიზიარებთ იმის არგუმენტაციას, რომ ეს არალეტალური მეთოდები აპრობირებულია უცხოეთში.  აღნიშნულ ცვლილებებთან  დაკავშირებით ჩვენს მისაზრებას და  რეკომენდაციებს  მივაწვდით  სასჯელაღსრულების, პრობაციისა და იურიდიული დახმარების სამინისტროს ხელმძღვანელობას. ვფიქრობ, გაითვალისწინებენ ჩვენს შენიშვნებს, – ამბობს  უფლებადამცველი გიორგი თევზაძე.