საიტი მუშაობს ტესტირების რეჟიმში
სპონსორი: PSnewsGE
საკანონმდებლო ინიციატივა
სახალხო დამცველი ციხეებში წიწაკისა და ცრემლსადენი გაზის გამოყენების წინააღმდეგია
ავტორი: PS („პოსტსკრიპტუმი“)
2014/01/28 16:49:15

საქართველოს სახალხო დამცველი ეხმიანება „პატიმრობის კოდექსში ცვლილებების შეტანის შესახებ“ კანონის პროექტს

საქართველოს სახალხო დამცველს მიაწოდეს საქართველოს მთავრობის მიერ ინიცირებული კანონის პროექტი „პატიმრობის კოდექსში ცვლილებების შეტანის შესახებ“. აღნიშნული დოკუმენტი  პატიმრობის კოდექსში მნიშვნელოვანი ცვლილებებისა და დამატებების  შეტანას ითვალისწინებს. ამჟამად მიმდინარეობს კანონპროექტის დეტალური შესწავლა და გაანალიზება ადამიანის უფლებათა სამართლის პოზიციიდან, რის შემდეგაც საქართველოს სახალხო დამცველის პოზიცია კანონის პროექტის შესახებ წარედგინება საქართველოს პარლამენტს. 

 


საქართველოს სახალხო დამცველი მიესალმება აღნიშნული კანონპროექტის სულისკვეთებას, რომელიც ითვალისწინებს პატიმრობის კოდექსის ლიბერალიზაციას თავისუფლებააღკვეთილ პირთა სასარგებლოდ. თუმცა, სახალხო დამცველს მიაჩნია, რომ კანონპროექტის ზოგიერთი დებულება მნიშვნელოვან გადახედვას საჭიროებს. ეს განსაკუთრებით ეხება კანონპროექტით გათვალისწინებულ სპეციალურ საშუალებებს, რომლებიც შეიძლება გამოყენებულ იქნას ბრალდებულის/მსჯავრდებულის მიმართ, ასევე, ამ საშუალებების გამოყენების წესს.

 


კანონპროექტის 571-ე მუხლით გაწერილია ისეთი სპეციალური საშუალებები, რომლებიც შეიძლება გამოყენებული იქნას ბრალდებულის/მსჯავრდებულის მიმართ სასჯელაღსრულების დაწესებულებაში მართლწესრიგის უზრუნველყოფის მიზნით.  ასეთ საშუალებებს შორის კანონპროექტი ჩამოთვლის დამაწყნარებელ პერანგს, დამაწყნარებელ სკამს, დამაწყნარებელ საწოლს, ცრემლსადენ და წიწაკის გაზს, არალეტალურ იარაღს, აკუსტიკურ საშუალებას, ფსიქოლოგიური ზემოქმედების შუქბგერით მოწყობილობას, წყალსატყორცნს და სხვა. 

 


მიუხედავად იმისა, რომ ზოგიერთი სპეციალური საშუალების გამოყენება აპრობირებულია სხვადასხვა ქვეყნის სამართალდამცავი ორგანოების წარმომადგენლების მიერ, საზოგადოებრივი წესრიგის დაცვის მიზნით, მათი გამოყენებისას ადამიანის უფლებათა საერთაშორისო სტანდარტებით დადგენილი პირობების დაცვაა აუცილებელი.

 


ცრემლსადენი და წიწაკის გაზის გამოყენებამ შეიძლება გამოიწვიოს მწვავე რესპირატორული პრობლემები. შესაბამისად, ადამიანის უფლებათა ევროპული სასამართლოსა და წამების პრევენციის ევროპული კომიტეტის (CPT) მიერ დადგენილი სტანდარტებით, დაუშვებელია წიწაკის გაზის ან ცრემლსადენი გაზის დახურულ სივრცეში გამოყენება.

 

ასევე დაუშვებელია მათი გამოყენება იმ პირთა წინააღმდეგ, რომლებიც უკვე იმყოფებიან ხელისუფლების წარმომადგენელთა კონტროლის ქვეშ. ამავდროულად, CPT-ს სტანდარტების მიხედვით, წიწაკის გაზი არ უნდა წარმოადგენდეს სასჯელაღსრულების ოფიცრის სტანდარტული აღჭურვილობის ნაწილს.

 


ზემოაღნიშნულიდან გამომდინარე, მიზანშეწონილად მიგვაჩნია, წიწაკისა და ცრემლსადენი გაზის გამოყენებასთან დაკავშირებით კანონპროექტით გათვალისწინებული იქნას შემდეგი პირობები:

·         ცალსახად უნდა აიკრძალოს მათი დახურულ სივრცეში გამოყენება;


·         უფრო დეტალურად გაიწეროს შემთხვევები, თუ როდის შეიძლება მათი გამოყენება;


·         იმ პატიმრებს, რომელთა მიმართაც აღნიშნული სპეციალური საშუალებები იქნება გამოყენებული, დაუყოვნებლივ უნდა ჰქონდეთ სამედიცინო დახმარებაზე წვდომა და გაეწიოთ შესაბამისი მკურნალობა;


·         უფლებამოსილ პირთა კვალიფიკაცია, მომზადება და შესაბამისი მინიმალური უნარ-ჩვევების ქონის აუცილებლობა უნდა დარეგულირდეს კანონქვემდებარე აქტით;

 


გარდა ამისა, სახალხო დამცველს გაუმართლებლად მიაჩნია ის მიზანი, რომლის მიღწევასაც შეიძლება ემსახურებოდეს ზოგიერთი საშუალების გამოყენება. მაგალითად, კანონის პროექტის 571(2)(გ) ქვეპუნქტის თანახმად, რეზინის ხელკეტისა ან/და წიწაკის გაზის გამოყენება დასაშვებია  ბრალდებულის/მსჯავრდებულის მიერ „საკუთარი თავის . . . დაზიანების თავიდან აცილების მიზნით“.

 

ასეთ შემთხვევაში, გონივრული იქნებოდა მსჯავრდებულის მიმართ სხვა საშუალების გამოყენება, სამედიცინო პერსონალის მკაცრი მეთვალყურეობის ქვეშ, რადგან ზემოაღნიშნული საშუალებების გამოყენებამ კანონპროექტით გათვალისწინებული მიზნის მიღწევის ნაცვლად, შესაძლებელია სრულიად საპირისპირო შედეგი გამოიწვიოს.

 


საქართველოს სახალხო დამცველს ასევე დაუშვებლად მიაჩნია ცრემლსადენი გაზის, აკუსტიკური საშუალების, არალეტალური იარაღის, ფსიქოლოგიური ზემოქმედების შუქბგერითი მოწყობილობის გამოყენება ინდივიდუალური ბრალდებულის/მსჯავრდებულის მიმართ.

 

აღნიშნული საშუალებების გამოყენება შეიძლება დასაშვები იყოს მხოლოდ მასობრივი არეულობის აღკვეთის მიზნით. ასევე, იქვე უნდა განისაზღვროს, რომ ზემოაღნიშნული საშუალებებისა და წიწაკის გაზის გამოყენება დაუშვებელია სასჯელაღსრულების სამკურნალო დაწესებულებებში და ავადმყოფი პატიმრების მიმართ.

 


საქართველოს სახალხო დამცველი ზემოაღნიშნულ და სხვა პრობლემურ საკითხებთან დაკავშირებით თავის დასკვნას უახლოეს მომავალში მიაწვდის საქართველოს პარლამენტს.

 

 

'.$TEXT['print'].'
სულ ნანახია - 2161
სხვა ამბები
ბოლოს იხილეს
დამზადებულია Pro-Service -ის მიერ
© PSnews 1995 - 2019 საავტორო უფლებები დაცულია